एकताको लागि सभापति थापाको कदम, देउवा र शेखर पक्षका १९ नेता केन्द्रीय समितिमा मनोनीत

---

नयाँ पेज

२०८३ बैशाख २८ सोमबार १८:०१ बजे

काठमाडौँ :  नेपाली कांग्रेसका सभापति गगन थापाले पार्टीभित्रको आन्तरिक एकतालाई मजबुत बनाउन महत्वपूर्ण कदम चालेका छन्। गत पुसमा सम्पन्न विशेष महाधिवेशनमा सहभागी नभएका निवर्तमान सभापति शेरबहादुर देउवा र नेता डा. शेखर कोइराला पक्षका १९ जना प्रभावशाली नेताहरूलाई सोमबार थापाले केन्द्रीय कार्यसमितिमा मनोनीत गरेका हुन्।

सभापति थापाले नेपाली कांग्रेसको विधान, २०१७ (संशोधन सहित) को धारा २१ को उपधारा (१०) बमोजिम महाधिवेशन प्रतिनिधिहरूमध्येबाट यी सदस्यहरूलाई मनोनयन गरेको केन्द्रीय कार्यालयले जनाएको छ। विशेष महाधिवेशनमार्फत नेतृत्व सम्हालेपछि थापाले पहिलो पटक केन्द्रीय सदस्यहरूको मनोनयन गरेका हुन्। यसअघि पुसमा १३३ जना केन्द्रीय सदस्यहरू सर्वसम्मत चयन भएका थिए।

मनोनयन हुनेहरूमा पूर्व सहमहामन्त्रीद्वय महेन्द्र यादव र जीवन परियार समेत छन्। यादव देउवा समूहका विश्वासपात्र मानिन्छन् भने परियार कोइराला निकट हुन्। यसैगरी सुजाता कोइराला, डा. चन्द्रकान्त भण्डारी र दिलेन्द्रप्रसाद बडू जस्ता सिनियर नेताहरूलाई पनि केन्द्रीय समितिमा समेटिएको छ।