.gif)
 (1).png){kind=logo}
.png)
इरानद्वारा दुबईको विशाल तेलभण्डार केन्द्रमा ड्रोन हमला
इरान : इरानले संयुक्त अरब इमिरेट्स (यूएई) को फुजाइरा बन्दरगाहमा शनिबार ड्रोन हमला गरेको छ। यो हमला अमेरिकाले इरानको खार्ग द्वीपमा भीषण आक्रमण गरेलगत्तै भएको हो।
यूएईका अधिकारीहरूले फुजाइरामा लागेको आगो निभाउने प्रयास जारी रहेको बताएका छन्। उनीहरूका अनुसार हवाई प्रतिरोध प्रणालीले नष्ट गरेको ड्रोन खस्दा आगलागी भएको हो।
फुजाइरा बन्दरगाह यूएईका लागि अत्यन्त महत्वपूर्ण स्थान हो। यो मध्यपूर्वकै सबैभन्दा ठूलो तेल भण्डारण केन्द्रहरूमध्ये एक मानिन्छ। साथै, अन्तर्राष्ट्रिय पानीजहाजहरूलाई इन्धन आपूर्ति गर्ने प्रमुख केन्द्रका रूपमा पनि यसलाई हेरिन्छ।
यो बन्दरगाह ओमानको खाडीमा अवस्थित छ। यहाँ पुग्नका लागि पानीजहाजहरूले जलक्षेत्रमा युद्ध सुरु भएको दुई सातायता लगभग बन्द रहेको हर्मुज स्ट्रेट पार गर्नुपर्दैन।
ड्रोन हमलापछि सामाजिक सञ्जालमा देखिएका भिडियोहरूमा यूएईको पूर्वी तटमा रहेको उक्त पूर्वाधार परिसरबाट बाक्लो धुवाँ उठिरहेको देखिएको छ।
यो हमला त्यतिखेर भएको हो जब इरानी रिभोलुसनरी गार्ड्स कोर (आईआरजीसी) ले अमेरिकाले आफ्नो खार्ग द्वीपमा आक्रमण गरेपछि अब यूएईका बन्दरगाह तथा अमेरिकी सैन्य ठेगानाहरू इरानका लागि वैध निशाना बनेको चेतावनी दिएको थियो।
तेहरानको तेल उद्योग र समग्र अर्थतन्त्रका लागि खार्ग द्वीप अत्यन्त महत्वपूर्ण मानिन्छ।
यसैबीच, इरानी सेनाको खताम मुख्यालयका प्रवक्ता कर्णेल इब्राहिम जुल्फीगरीले यूएईका बन्दरगाहमा रहेका अमेरिकी क्षेप्यास्त्र प्रणाली तथा अमेरिकी सैनिक “लुक्ने स्थल” हरूमा आक्रमण गर्नु इरानको वैध अधिकार भएको बताएका छन्।
उनले सम्भावित जोखिमबाट बच्न यूएईका सहरहरू खाली गर्न मुस्लिमहरूलाई आह्वानसमेत गरेका छन्।
यसअघि खाडी मुलुक कतारमा पनि अमेरिकी व्यापारिक स्वार्थ जोडिएका केही स्थानहरू खाली गर्न अधिकारीहरूले आदेश दिएका थिए। इरानले ती स्थानहरूलाई सम्भावित निशाना बताएपछि त्यहाँका बासिन्दालाई अन्यत्र सर्न आग्रह गरिएको हो।
गुगल र अमेरिकन एक्सप्रेस जस्ता अमेरिकी कम्पनीहरूको कार्यालय रहेको राजधानी दोहाको मुशेइरेब डिस्ट्रिक्ट क्षेत्रमा मानिसहरूलाई फोनमार्फत् सावधानी सन्देश पठाएर स्थान खाली गर्न आग्रह गरिएको बताइएको छ।
