सचिवालय चलिरहेको बेला एमाले पदाधिकारीलाई युवाहरूको म्यासेज : सच्चिने र सक्किने ?

---

नयाँ पेज

२०८२ असोज १२ आइतबार १५:४३ बजे

काठमाडौं : नेकपा (एमाले) को सचिवालय बैठक बसिरहँदा पार्टीसम्बद्ध अघि एमाले देशभरीका युवा नेताहरुले पदाधिकारीहरूलाई म्यासेजको अभियान चलाएका छन्  ।

‘परिर्वतनका लागि युवा समूह’को नाममा उनीहरूले अब एमालेसामु दुईवटा विकल्प रहेको उल्लेख गर्दै कम्युनिष्ट आन्दोलन र देशलाई संकटमा लैजान नहुने बताएका हुन् । सबै पदाधिकारीहरुलाई म्यासेज गरिएको निराजन पौडेलले बताए । 

अखिलका पूर्व सचिव समेत रहेका युवा नेता दिपेश पछाईका अनुसार उनीले म्यासेजमा भनेका छन्, ‘हामी कम्युनिष्ट आन्दोलनको नयाँ घुम्तीमा उभिएका छौं । अब एमालेसँग दुई विकल्प छ, ‘कि सच्चिने, कि त सक्किने ?’ एमाले सक्कियो भने कम्युनिष्ट आन्दोलन पनि सक्किने बाटोमा जानेछ । देश संकटमा पर्नेछ । एमालेको वर्तमान नेतृत्वबाट एमाले, कम्युनिष्ट आन्दोलन र देशको रक्षा सम्भव छैन । हामीलाई गहिरो विश्वास छ, ‘गलत नेतृत्वको रक्षा गरेर कम्युनिष्ट आन्दोलन र देशलाई संकटमा लैजानु हुने छैन ।’ त्यसैले पार्टीको सबै संरचनामा रूपान्तरण र पुनर्गठन ।  निर्णय आजै गर्नुहोला । नयाँ सन्देश प्रवाह गर्नुहोला । हामी पुनर्गठन सन्देश बोकेर दशैंमा गाउँ जानेछौं ।’ 

भदौ २३ को जेनजी विद्रोहपछि पहिलो पटक नेकपा (एमाले)को सचिवालय बैठक जारी छ । सचिवालय बैठकमा जेनजी युवा आन्दोलन, आन्दोलनमा भएको जनधनको क्षति, केपी शर्मा ओलीले नेतृत्व गरेको तत्कालीन सरकारको भूमिका, पार्टीले अवलम्बन गर्ने अबको बाटो लगायतका विषयमा छलफल हुने बताइएको छ ।

तत्कालीन प्रधानमन्त्री एवम् एमाले अध्यक्ष केपी शर्मा ओलीले संविधान दिवसको दिन एक विज्ञप्ति निकालेर जेनजी युवा आन्दोलनमा ताकीताकी गोली हान्ने आदेश नदिइएको र प्रहरीले प्रयोग गर्ने भन्दा बाहेकका हतियारबाट गोली चलेको दाबी गरेका थिए ।

ओलीले ५ मिनेट मात्रै ढिला भएको भए प्रर्दशनकारीहरुले आफूलाई मार्ने बताएका थिए। ओलीलाई २४ गतेको विद्रोहमा सैनिक हेलिकोप्टरबाट प्रधानमन्त्रीको सरकारी निवास बालुवाटारबाट भगाएर सैनिक ब्यारेक शिवपुरि लगिएको थियो ।

ओलीले भनेका छन्, ‘५ मिनेट मात्रै ढिला गरेको भए मलाई चहिँ मार्ने नै थिए । शेरबहादुरजीलाई घाइते बनायो, मलाई चहिँ मार्ने नै थिए । मैले आफ्नो तयारी गर्न पाइँन । मलाई सेक्युरीटिमा अलिकति भरोषा भयो । सेक्युरीटिले हामीले केही गर्न सक्दैनौं भन्यो । अन्तिममा सेनाले भगाईसम्म दियो ।’ 

प्रधानमन्त्रीले राजीनामा नदिए सेनाले रेस्क्यु गर्न नसक्ने बताएपछि ओलीले २४ गते दिउँसो २ बजे राजिनामा दिएका थिए ।राजीनामालगत्तै ओली, उनकी पत्नी राधिका शाक्य र मुख्य सल्लाहकार विष्णु रिमाललाई सेनाले दिउँसो ०२:३० बजे हेलिकोप्टरमा शिवपुरीस्थित स्टाफ कलेजको ब्यारेकमा लगेको थियो ।

बालुवाटारमै रहेका उपप्रधानमन्त्री विष्णु पौडेल, महासचिव शंकर पोखरेल र उपमहासचिव प्रदीप ज्ञवालीलाई भने माथिको आदेश भन्दै त्यहीँ छोडेको थियो । उनीहरू प्रहरीको सहयोगमा प्रहरी प्रधान कार्यालय पुगेर सुरक्षित भएका थिए ।

२३ भदौमा १९ युवाको ज्यान गएपछि २४ भदौको बिहानैदेखि आन्दोलन चर्किएको थियो । बिहान १० बजे मुख्यसचिव एकनारायण अर्याल प्रधानसेनापति अशोकराज सिग्देल, प्रहरी महानिरीक्षक चन्द्रकुवेर खापुङ, सशस्त्र प्रहरी महानिरीक्षक राजु अर्याल र राष्ट्रिय अनुसन्धान विभागका प्रमुख हुतराज थापा गृह मन्त्रालयमा बैठक बसेर प्रधानमन्त्रीसँग छलफलका लागि बालुवाटार पुगेका थिए ।

उनीहरूले पनि परिस्थिति असामान्य बन्दै गएकाले राजनीतिक निकासका लागि सुझाव दिए । तर, ओली उल्टै आक्रोशित भएका थिए । भनेका थिए, ‘राजनीतिक निकास भनेको राजीनामा रु सुरक्षाकर्मीले आफ्नो जिम्मेवारी पूरा गर्न नसक्ने ? अनि प्रधानमन्त्रीले राजनीतिक निकास दिने ? तपाईंहरूको परिभाषित जिम्मेवारी जे हो, त्यो पूरा गर्नोस्, स्थिति ठीक हुन्छ । म यहाँ बस्ने कुर्सी ओगट्न होइन, राष्ट्रको चुनौती पूरा गर्नका लागि हो । तपाईंहरुले पनि त्यो पूरा गर्नोस् ।’

राजीनामा दिएर निकास दिन प्रधानसेनापतिले आग्रह गरेपछि ओली थप आक्रोशित बनेका थिए । प्रधानमन्त्री आक्रोशित भएपछि निराश सुरक्षा प्रमुखहरू प्रधानमन्त्रीको बैठक कक्षबाट सडक प्रदर्शनको जानकारी लिन थाले । बाहिर स्थिति भयावह भइसक्यो भने रिपोर्ट आइरहेको थियो ।

त्यसपछि मुख्यसचिव र प्रधानसेनापतिले अर्थमन्त्री पौडेल र प्रधानमन्त्रीका सल्लाहकार रिमालसँग प्रधानमन्त्रीले राजीनामा नदिने हो भने थाम्न सकिँदैन भनेका थिए । उनी राजीनामा नदिएरै बालुवाटारबाट सुरक्षित स्थानतिर जाने तयारीमा थिए । तर, सेनाले राजीनामा नदिई उनलाई रेस्क्यु गर्न मानेन । अनि बल्ल २ बजेतिर ओलीले राजीनामापत्रमा हस्ताक्षर गरे ।