गृहमन्त्रीकी आमाको भिडियो सार्वजनिक गर्ने युट्युबर पक्राउ
काठमाडौं : गृहमन्त्री सुधन गुरुङकी आमाको भिडियो सामाजिक सञ्जालमा सार्वजनिक गर्ने एक युट्युबरलाई प्रहरीले पक्राउ गरेको छ ।
कालीकोट घर भई भक्तपुर बस्दै आएका छत्र बोगटीलाई भक्तपुरबाट पक्राउ गरिएको जिल्ला प्रहरी परिसर काठमाडौंका प्रवक्ता एसपी दानबहादुर थापाले जानकारी दिए ।
वैयक्तिक गोपनीयताको हक हनन गरेको आरोपमा पक्राउ परेका बोगटीलाई काठमाडौं जिल्ला अदालतबाट पाँच दिनको म्याद थप गरी अनुसन्धान अघि बढाइएको छ ।
गृहमन्त्रीकी आमा ४९ वर्षीया ज्ञानु लामा (ज्वालादेवी चण्डिमाता) ले आफ्नो अनुमतिबिना भिडियो खिचेर सामाजिक सञ्जालमा सार्वजनिक गरिएको भन्दै प्रहरीमा उजुरी दिएकी थिइन् । सोही उजुरीका आधारमा उनलाई पक्राउ गरिएको प्रहरी स्रोतले जनाएको छ ।
केही दिनअघि सार्वजनिक भएको भिडियोमा लामाले छोरा गृहमन्त्री बनेपछि भेट नभएको र आफूलाई अहिले छोराछोरीको आर्थिक सहयोग आवश्यक नरहेको बताएकी थिइन् ।
भिडियो भाइरल भएपछि लामाले अर्को भिडियो सार्वजनिक गर्दै आफूले अन्तर्वार्ता दिन अनुमति नदिएको र कुराकानी लुकेर खिचिएको दाबी गरेकी थिइन् ।
उनले कसैको व्यक्तिगत जीवनमा असर पर्ने गरी भिडियो सार्वजनिक नगर्न र घटनामा संलग्नमाथि कारबाही गर्न माग गरेकी छन् ।
.gif)

.png)




