भोटेकोशी बाढीपीडितका लागि इप्पानमा आबद्ध ऊर्जा उद्यमीले दिए १३ करोड

---

नयाँ पेज

२०८३ भदौ १६ मंगलबार १६:५१ बजे

काठमाडौं : स्वतन्त्र ऊर्जा उत्पादकहरूको संस्था नेपाल (इप्पान)मा आबद्ध ऊर्जा उद्यमीहरूले भोटेकोशी बाढी प्रभावितको उद्धार, राहत तथा पुनःनिर्माणका लागि १३ करोड १ लाख रुपैयाँ सहयोग गरेका छन्।  इप्पानका अध्यक्ष मोहनकुमार डाँगीले सिंहदरबारमा आयोजित कार्यक्रममा ऊर्जा, जलस्रोत तथा सिँचाइमन्त्री विराजभक्त श्रेष्ठलाई उक्त रकमको चेक हस्तान्तरण गरेका हुन्।

ऊर्जा उद्यमीहरूले व्यक्तिगत तथा संस्थागत रूपमा संकलन गरेको रकम विपद् कोषमा जम्मा गरिएको हो। चेक हस्तान्तरण कार्यक्रममा मन्त्री श्रेष्ठले जलवायु परिवर्तनका कारण जलविद्युत् आयोजना प्राकृतिक विपद्को जोखिममा परिरहेको भन्दै आगामी दिनमा जलवायु परिवर्तनमैत्री र विपद् प्रतिरोधी संरचना निर्माणमा ध्यान दिनुपर्ने बताए। यसैगरी इप्पानका अध्यक्ष डाँगीले भोटेकोशी बाढीपहिरोबाट १३ वटा जलविद्युत् आयोजना प्रभावित भएको उल्लेख गर्दै संकटको समयमा राज्य र प्रभावित नागरिकलाई साथ दिन सहयोग गरिएको बताए।

इप्पानका अनुसार यसरी सहयोग गर्नेमा मोहनविक्रम कार्की समूहले १ करोड ६५ लाख, हिमप्रसाद पाठक तथा समूहले १ करोड ५१ लाख, पुष्पज्योति ढुंगाना तथा समूहले १ करोड ७ लाख ७७ हजार ७७५ रुपैयाँलगायत छन्। यसैगरी विभिन्न ऊर्जा उद्यमी, जलविद्युत् कम्पनी तथा समूहले १ लाखदेखि ८७ लाख रुपैयाँसम्म सहयोग गरेका छन्। इप्पान दैवीप्रकोप उद्धार कोषले समेत ६ लाख ३२ हजार २३ रुपैयाँ प्रधानमन्त्री दैवीप्रकोप उद्धार कोषमा सहयोग गरेको जनाएको छ।

हेर्नूहोस् राहत कोषमा सहयोग गर्ने दाता तथा समूहको नामावलीः

स्रोतः इपान