.gif)
 (1).png){kind=logo}
.png)
अनेरास्ववियुको काउन्टर : बालेन र सुदनविरुद्ध किटानी जाहेरी दिने तयारी
काठमाडौँ : नेकपा एमालेका अध्यक्ष तथा पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलाई पक्राउ गर्न भन्दै जेनजी प्रहरी परिसर पुगेको भोलिपल्ट अनेरास्ववियुले काउन्टर दिने तयारी गरेको छ ।
अनेरास्ववियुले काठमाडौँ महानगरपालिकाका मेयर बालेन्द्र साह (बालेन) र ‘हामी नेपाल’ का संस्थापक सुदन गुरुङविरुद्ध किटानी जाहेरी दिने तयारी गरेको छ।
अनेरास्ववियुका नेताहरू मंगलबार साँझ ५ बजेभित्र जाहेरी दर्ता गर्न काठमाडौँ प्रहरी परिसर जाने तयारीमा रहेका अखिलका महासचिव दीपक धामीले जानकारी दिएका छन् ।
सिंहदरबारलगायत सरकारी संरचनामा गरिएको आगजनी, निजी सम्पत्ति तोडफोड र प्रहरीको हत्याजस्ता गतिविधिमा बालेन र गुरुङको संलग्नता रहेको आरोपसहित जाहेरी दिन लागेका बुझिएको छ ।
यसअघि सोमबार सुदन गुरुङ समूहले ओली र तत्कालीन गृहमन्त्री रमेश लेखकविरुद्ध किटानी जाहेरी दिने प्रयास गरेको थियो । तर, प्रहरीले जाहेरी लिन अस्वीकार गरेको थियो ।
उक्त घटनापछि प्रधानमन्त्री सुशीला कार्कीले गृहमन्त्री ओमप्रकाश अर्यालसहित सुरक्षा निकाय प्रमुखहरूसँग छलफल गरेकी थिइन् । प्रहरी महानिरीक्षक चन्द्रकुवेर खापुङले जाहेरी दर्ताका लागि प्रधानमन्त्रीबाटै लिखित निर्देशन आवश्यक पर्ने सुझाव दिएका थिए ।
