.gif)
 (1).png){kind=logo}
.png)
प्रतिखेलाडी २५ हजार डलर मागपछि एनपिएलमा पाकिस्तानी खेलाडीको सहभागिता अनिश्चित
एनपीएल सुरु हुनुअघि पीसीबीको अड्को, पाकिस्तानी खेलाडीको एनओसी अन्योलमा ।
काठमाडौं : नेपाल प्रिमियर लिग (एनपीएल) को तेस्रो संस्करण सुरु हुन एक दिन बाँकी रहँदा पाकिस्तानी खेलाडीको सहभागिता अन्योलमा परेको छ। पाकिस्तान क्रिकेट बोर्ड (पीसीबी) ले प्रतियोगितामा सहभागी हुने आफ्ना खेलाडीलाई आवश्यक नाे अब्जेक्सन लेटर (एनओसी) दिने प्रक्रिया रोकेपछि उनीहरूको सहभागिताबारे अनिश्चितता बढेको हो।
क्रिकेटसम्बन्धी सञ्चारमाध्यम ईएसपीएन क्रिकइन्फोका अनुसार पीसीबीले एनपीएल खेल्ने पाकिस्तानी खेलाडीका लागि प्रतिखेलाडी २५ हजार अमेरिकी डलर मागेको दाबी गरिएको छ। नेपाल आइसकेका केही खेलाडीको एनओसीसमेत रोकिएको र शुल्क नतिरे प्रमाणपत्र फिर्ता लिने चेतावनी दिइएको विवरणमा उल्लेख छ।
एनपीएलका टोलीबाट प्राप्त सूचनाका आधारमा उक्त विवरण सार्वजनिक गरिएको हो। नेपाली पक्ष र पीसीबीबीच यस विषयमा छलफल भइरहेको जनाइएको छ। तर, प्रतिखेलाडी २५ हजार अमेरिकी डलर मागिएको तथा प्रमाणपत्र फिर्ता लिने चेतावनी दिइएको विषयमा पीसीबीले आधिकारिक पुष्टि गरेको छैन।
एनपीएलका विभिन्न टोलीले पाकिस्तानका अन्तर्राष्ट्रिय तथा व्यावसायिक क्रिकेटरलाई अनुबन्ध गरेका छन्। चितवन राइनोजले हसन अली र उसामा मिरलाई टोलीमा समेटेको छ। जनकपुर बोल्ट्समा इफ्तिखार अहमद र हुनैन शाह छन् भने कर्णाली याक्सले पाकिस्तानका टी–२० कप्तान साहिबजादा फरहान र अलराउन्डर हुसेन तलातलाई अनुबन्ध गरेको छ। सुदूरपश्चिम रोयल्ससँग हैदर अलीको नाम जोडिएको छ।
यीमध्ये केही खेलाडी नेपाल आइसकेका छन्। तर, खेलाडी अनुबन्ध हुँदैमा प्रतियोगितामा सहभागी हुन आवश्यक सबै प्रक्रिया पूरा भएको मानिँदैन। विदेशी खेलाडीले प्रतियोगितामा खेल्न सम्बन्धित राष्ट्रिय क्रिकेट बोर्डबाट आवश्यक अनापत्ति प्रमाणपत्र लिनुपर्ने हुन्छ। प्रमाणपत्र प्राप्त नभएमा उनीहरूले प्रतियोगितामा खेल्न पाउँदैनन्।
एनपीएलको तेस्रो संस्करण सोमबार, अक्टोबर २६ देखि कीर्तिपुरस्थित त्रिवि अन्तर्राष्ट्रिय क्रिकेट मैदानमा सुरु हुँदै छ। नोभेम्बर २१ सम्म सञ्चालन हुने प्रतियोगितामा आठ टोली सहभागी छन्। प्रतियोगिता सुरु हुनुअघि एनओसी विवाद समाधान नभएमा पाकिस्तानी खेलाडी अनुबन्ध गरेका टोलीको अन्तिम तयारी, खेल रणनीति र टोली व्यवस्थापन प्रभावित हुन सक्छ।
पाकिस्तानी खेलाडीलाई विदेशी फ्रेन्चाइज लिगमा सहभागी हुन अनुमति दिँदा शुल्क मागिएको विषय यसअघि पनि चर्चामा आएको थियो। यस वर्ष अमेरिकाको मेजर लिग क्रिकेटका केही टोलीले पाकिस्तानी खेलाडीको एनओसीका लागि प्रतिखेलाडी २५ हजार अमेरिकी डलर मागिएको गुनासो गरेको विवरण सार्वजनिक भएको थियो। पाकिस्तान क्रिकेट बोर्डका अध्यक्ष मोहसिन नक्वीले विदेशी लिगमा खेल्ने खेलाडीबाट प्राप्त हुने शुल्क बोर्डको आम्दानीको वैध स्रोत भएको तर्क गरेको विवरणसमेत सार्वजनिक भएको थियो।
एनपीएलका लागि पनि प्रतिखेलाडी २५ हजार अमेरिकी डलर शुल्क मागिएको दाबी पुष्टि भएमा छ खेलाडीका लागि एक लाख ५० हजार र सात खेलाडीका लागि एक लाख ७५ हजार अमेरिकी डलर आवश्यक पर्नेछ। यद्यपि, एनपीएलमा सहभागी हुने खेलाडीका हकमा यस्तो शुल्क औपचारिक रूपमा निर्धारण गरिएको हो वा होइन भन्ने स्पष्ट भएको छैन।
पीसीबी र नेपाली पक्षबीच भइरहेको छलफलको परिणाम सार्वजनिक भइसकेको छैन। पाकिस्तानी खेलाडीले समयमै अनापत्ति प्रमाणपत्र पाउँछन् वा पाउँदैनन् भन्ने विषयले एनपीएलमा उनीहरूको सहभागिता निर्धारण गर्नेछ।
