.gif)
 (1).png){kind=logo}
.png)
प्रधानमन्त्रीको पहिलो विदेश भ्रमण अमेरिकाबाट
परराष्ट्र मन्त्रालयले थाल्यो तयारी
काठमाडौं : प्रधानमन्त्री बालेन्द्र शाहले प्रधानमन्त्री बनेपछि आफ्नो पहिलो विदेश भ्रमण अमेरिकाबाट सुरु गर्ने तयारी गरेका छन् । संयुक्त राष्ट्रसंघको ८१औँ महासभामा सहभागी हुन प्रधानमन्त्री शाह अमेरिका जाने तयारी अघि बढाइएको हो ।
प्रधानमन्त्री शाहले पदभार सम्हालेयता हालसम्म कुनै पनि विदेश भ्रमण गरेका छैनन् । उनको पहिलो विदेश भ्रमण भारत वा चीनबाट हुने चर्चा गरिँदै आए पनि पछिल्लो तयारीअनुसार उनी संयुक्त राष्ट्रसंघीय महासभामा सहभागी हुन अमेरिका जाने भएका हुन् । प्रधानमन्त्री शाहको अमेरिका भ्रमणका लागि परराष्ट्र मन्त्रालयले आवश्यक तयारी र गृहकार्य अघि बढाएको एक उच्च अधिकारीले बताए ।
संयुक्त राष्ट्रसंघको महासभा प्रधानमन्त्री शाहका लागि नेपालको पछिल्लो राजनीतिक, आर्थिक तथा कूटनीतिक अवस्थाबारे अन्तर्राष्ट्रिय समुदायलाई जानकारी गराउने महत्वपूर्ण अवसर हुनेछ । विशेषगरी पछिल्लो समय नेपालमा आएको विनाशकारी बाढी, जलवायु परिवर्तनका कारण नेपालले भोगिरहेको असर तथा जलवायु न्यायको विषय महासभामा उठाउने तयारी भइरहेको उच्च अधिकारीहरूको भनाइ छ ।
अमेरिका भ्रमणका क्रममा प्रधानमन्त्री शाहले संयुक्त राष्ट्रसंघीय महासभामा सम्बोधन गर्नुका साथै विभिन्न देशका सरकार तथा राष्ट्रप्रमुख, उच्चपदस्थ अधिकारी र अन्तर्राष्ट्रिय संस्थाका प्रतिनिधिसँग महत्वपूर्ण भेटवार्ता गर्ने अपेक्षा गरिएको छ । ती भेटवार्तामा नेपालको आर्थिक विकास, लगानी, विपद् व्यवस्थापन, जलवायु परिवर्तन तथा अन्तर्राष्ट्रिय सहयोगका विषयमा छलफल हुने सम्भावना छ ।
प्रधानमन्त्री शाहको पहिलो विदेश भ्रमण अमेरिकाबाट सुरु हुने तयारीलाई नेपालको परम्परागत कूटनीतिक अभ्यासभन्दा फरक कदमका रूपमा समेत हेरिएको छ । विगतमा नेपाली प्रधानमन्त्रीहरूको पहिलो विदेश भ्रमण प्रायः छिमेकी मुलुक भारत वा चीनबाट हुने गरेको थियो । तर, शाहले पहिलो विदेश भ्रमण अमेरिकाबाट गर्ने तयारी गरेसँगै यसलाई नेपालको बदलिँदो कूटनीतिक प्राथमिकताको संकेतका रूपमा समेत व्याख्या गर्न थालिएको छ ।
नेपालका दुई ठूला छिमेकी भारत र चीनसँग सम्बन्धलाई थप सुदृढ बनाउने चुनौतीका बीच प्रधानमन्त्री शाहको पहिलो विदेश भ्रमण अमेरिका हुन लागेको हो । पछिल्लो समय दुवै छिमेकीसँगको सम्बन्धमा अपेक्षित गति आउन नसकेको विदेश मामिलाका जानकारहरूको विश्लेषण छ । यस्तो अवस्थामा प्रधानमन्त्री शाहको पहिलो विदेश भ्रमण अमेरिकाबाट सुरु हुनुलाई अर्थपूर्ण रूपमा हेरिएको छ ।
यद्यपि, प्रधानमन्त्री शाहको अमेरिका भ्रमणको मिति, भ्रमण टोली तथा द्विपक्षीय भेटवार्ताको विस्तृत कार्यतालिका भने औपचारिक रूपमा सार्वजनिक हुन बाँकी छ ।
