.gif)
 (1).png){kind=logo}
.png)
अनुभवी मोरक्कोविरुद्ध इतिहास रच्ने अभियानमा क्यानडा
एजेन्सी । सह–आयोजक क्यानडाले फिफा विश्वकप २०२६ मा इतिहास रच्दै पहिलो पटक नकआउट चरणमा स्थान बनाएको छ। अब उसले अन्तिम–१६ मा प्रतियोगिताकै बलियो टोलीमध्ये एक मोरक्कोसँग शनिबार ह्युस्टनमा प्रतिस्पर्धा गर्दैछ। क्यानडाका लागि यो अहिलेसम्मकै सबैभन्दा कठिन परीक्षा मानिएको छ।
घरेलु टोली, तर घरेलु फाइदा छैन
विश्वकपको सह–आयोजक भए पनि क्यानडाका अधिकांश खेल अमेरिकाका विभिन्न सहरमा भइरहेका छन्। लस एन्जलसमा दक्षिण अफ्रिकालाई पराजित गर्दै अन्तिम–१६ पुगेको प्रशिक्षक जेसी मार्शको टोली अब ह्युस्टनमा अर्को चुनौती सामना गर्न तयार छ।
मोरक्कोको अनुभव, क्यानडाको आत्मविश्वास
सन् २०२२ को विश्वकपमा सेमिफाइनलसम्म पुगेको मोरक्को यसपटक पनि उपाधिको बलियो दाबेदारका रूपमा प्रस्तुत भएको छ। राउन्ड अफ ३२ मा नेदरल्यान्ड्सलाई पेनाल्टी सुटआउटमा हराउँदै अन्तिम–१६ मा पुगेको अफ्रिकी टोली क्वार्टरफाइनल पुग्ने लक्ष्यमा छ।
यता, क्यानडाले पनि उत्कृष्ट लय कायम राखेको छ। पहिलो पटक नकआउट चरणमा पुगेको टोलीले आत्मविश्वासका साथ मैदान उत्रने तयारी गरेको छ। यद्यपि, अनुभवी मोरक्कोलाई पराजित गर्न क्यानडाले आफ्नो इतिहासकै उत्कृष्ट प्रदर्शन गर्नुपर्ने विश्लेषण गरिएको छ।
काउन्टर अट्याकको रोमाञ्चक भिडन्त
दुवै टोली काउन्टर अट्याकमा निकै प्रभावकारी मानिन्छन्। मोरक्कोले बलमाथि बढी नियन्त्रण राख्ने अपेक्षा गरिए पनि क्यानडाले तीव्र गतिका प्रतिआक्रमणमार्फत अवसर सिर्जना गर्ने रणनीति अपनाउने सम्भावना छ। त्यसैले यो खेल रणनीतिक रूपमा निकै रोचक बन्ने अनुमान गरिएको छ।
यी खेलाडीमाथि हुनेछ विशेष नजर
क्यानडाका लागि यस विश्वकपमा सर्वाधिक गोल गरेका जोनाथन डेभिड फेरि आक्रमणको केन्द्रमा रहनेछन्। युभेन्टसका स्ट्राइकर डेभिडसँगै प्रोमिस डेभिड, काइल लारिन र विङर ताजोन बुकाननबाट पनि टोलीले ठूलो अपेक्षा गरेको छ।
चोटबाट फर्किएका अल्फोन्सो डेभिस पूर्ण रूपमा फिट नरहेकाले उनी सुरुदेखि खेल्ने वा बेन्चबाट मैदान छिर्ने भन्ने निर्णय अन्तिम समयमा हुनेछ।
मोरक्कोतर्फ कप्तान अचरफ हाकिमी सबैभन्दा ठूलो हतियार हुन्। उनले दायाँ विङबाट आक्रमण निर्माण गर्ने मात्र होइन, यस विश्वकपमा सर्वाधिक अवसर सिर्जना गर्ने खेलाडीमध्ये आफूलाई स्थापित गरेका छन्। युवा मिडफिल्डर आयुब बुआद्दी, आक्रमणकारी ब्राहिम डियाज तथा अनुभवी गोलकिपर यासिन बोनो मोरक्कोका अन्य प्रमुख खेलाडी हुन्।
चोटले क्यानडालाई चिन्ता
क्यानडाका स्टार अल्फोन्सो डेभिसको फिटनेस टोलीका लागि मुख्य चिन्ताको विषय बनेको छ। उनी पूर्ण लयमा फर्किन बाँकी छ। अर्का मिडफिल्डर इस्माइल कोने समूह चरणमै गम्भीर चोटका कारण प्रतियोगिताबाट बाहिरिसकेका छन्।
मोरक्कोतर्फ नायेफ अगुएर्द र अब्दे एज्जाल्जुलीको फिटनेसबारे केही शंका रहे पनि प्रशिक्षक मोहम्मद वहबीसँग लगभग पूर्ण रूपमा फिट टोली उपलब्ध रहेको छ।
को बन्ला क्वार्टरफाइनलको यात्रु?
एकातिर पहिलो पटक इतिहास रच्दै क्वार्टरफाइनल पुग्ने सपना बोकेको क्यानडा छ भने अर्कोतिर आफ्नो विश्व फुटबलको उभारलाई निरन्तरता दिन चाहने मोरक्को। दुवै टोली उत्कृष्ट लयमा रहेकाले ह्युस्टनमा हुने यो प्रतिस्पर्धा अन्तिम–१६ कै सबैभन्दा रोमाञ्चक खेलमध्ये एक हुने अपेक्षा गरिएको छ।
