९ दिनभित्रै तेस्रो पटक बढ्यो इन्धनको मूल्य

नयाँ दिल्लीमा पेट्रोल र डिजेल दुवै महँगा

---

नयाँ पेज

२०८३ जेठ ९ शनिबार ०९:०३ बजे

काठमाडौँः छिमेकी मुलुक भारतमा पेट्रोलियम पदार्थको मूल्यमा पुनः वृद्धि भएको छ। त्यहाँका सरकारी स्वामित्वमा रहेका इन्धन खुद्रा विक्रेताहरूले पेट्रोल र डिजेलको साविकको मूल्यमा थप वृद्धि गरेपछि उपभोक्ताहरू महँगीको मारमा परेका हुन्।

नयाँ मूल्य सूची अनुसार भारतको संघीय राजधानी नयाँ दिल्लीमा पेट्रोलको भाउ प्रतिलिटर ८७ पैसाले बढेको छ। यस वृद्धिसँगै अब त्यहाँ पेट्रोलको खुद्रा मूल्य प्रतिलिटर ९९.५१ भारतीय रुपैयाँ (भारु) कायम भएको छ। यसैगरी, डिजेलको मूल्यमा पनि प्रतिलिटर ९१ पैसा थपिएको छ, जसका कारण दिल्लीमा डिजेलको नयाँ मूल्य प्रतिलिटर ९२.४९ भारु पुगेको छ।

भारतीय सञ्चारमाध्यमहरूले जनाए अनुसार पछिल्लो ९ दिनको छोटो अवधिभित्रै इन्धनको मूल्य बढाएको यो तेस्रो पटक हो। अन्तराष्ट्रिय बजारमा कच्चा तेलको मूल्यमा आएको उतारचढाव र तेल कम्पनीहरूको घाटा कम गर्न यो कदम चालिएको बताइएको छ।

यसअघि, मे १९ मा पनि इन्धनको मूल्यमा पुनरावलोकन गर्दै पेट्रोल र डिजेलको दर औसतमा प्रतिलिटर ९० पैसाले बढाइएको थियो। त्यसैगरी, सोही महिनाको सुरुवातमा अर्थात् मे १५ मा तेल कम्पनीहरूले प्रतिलिटर ३ रुपैयाँको ठुलो वृद्धि गरेका थिए। पछिल्ला यी शृङ्खलाबद्ध निर्णयहरूले भारतमा ढुवानी र दैनिक उपभोग्य वस्तुको मूल्य समेत बढाउन सक्ने देखिएको छ।