.gif)
 (1).png){kind=logo}
.png)
तीन महिनामा १७५ विदेशी नागरिक नेपालबाट निष्कासित
काठमाडौं : पछिल्लो तीन महिनामा १७५ जना विदेशी नागरिक नेपालबाट निष्कासित भएका छन् ।
गृह मन्त्रालयले सार्वजनिक गरेको त्रैमासिक प्रगति विवरणअनुसार साउनदेखि असोजसम्म ती विदेशी नागरिक निष्कासनमा परेका हुन् ।
मन्त्रालयको विवरणअनुसार साउन महिनामा ५२ जना विदेशी नागरिक निष्कासित भएका थिए।
भदौमा यो संख्या बढेर ५९ पुगेको थियो भने असोजमा ६४ जना निष्कासनमा परेका छन् । तीन महिनाको अवधिमा असोजमा सबैभन्दा धेरै विदेशी नागरिक निष्कासित भएका हुन् ।
गृह मन्त्रालयको सीमा तथा अध्यागमन शाखाअन्तर्गतको कार्यप्रगति विवरणमा निष्कासनसम्बन्धी तथ्यांक समेटिएको छ ।
तर, ती विदेशी नागरिकलाई के–कस्ता कारणले निष्कासन गरिएको हो भन्ने विषयमा मन्त्रालयले विस्तृत जानकारी दिएको छैन ।
सरकारी कार्यालयहरूले आफ्नो कामकारबाही पारदर्शी बनाउन प्रत्येक तीन महिनामा प्रगति विवरण सार्वजनिक गर्नुपर्ने कानुनी व्यवस्था छ ।
सूचनाको हकसम्बन्धी ऐन, २०६४ को दफा ५ (३) र सूचनाको हकसम्बन्धी नियमावली, २०६५ को नियम ३ अनुसार सार्वजनिक निकायले त्रैमासिक रूपमा सूचना अद्यावधिक गरी प्रकाशन गर्नुपर्छ ।
ऐनको दफा ५ को उपदफा ३ मा सार्वजनिक निकायले आफ्नो स्थापना र विकासको समयलाई विचार गरी कम्तीमा प्रत्येक तीन महिनामा सूचना अद्यावधिक गरेर प्रकाशन गर्नुपर्ने व्यवस्था छ ।
यही कानुनी प्रावधानअनुसार गृह मन्त्रालयले पनि पछिल्लो तीन महिनाको कार्यप्रगति विवरण सार्वजनिक गरेको हो ।
2026-11-09-15-41-32.jpg)
