मध्यपूर्व तनाव चर्किएपछि कच्चा तेलको मूल्य १०० डलर नाघ्यो

---

नयाँ पेज

२०८३ भदौ २६ शुक्रबार ०८:०३ बजे

मध्यपूर्वमा प्रमुख ढुवानी मार्गमाथि आक्रमण तीव्र बन्दै गएपछि विश्व बजारमा कच्चा तेलको मूल्य थप बढेको छ। आपूर्तिमा दीर्घकालीन अवरोध हुनसक्ने आशंकाबीच ब्रेन्ट र वेस्ट टेक्सास इन्टरमिडिएट (डब्लूटीआई) दुवैको मूल्य मध्य–मेयता पहिलोपटक प्रति ब्यारेल १०० डलरभन्दा माथि पुगेका छन्।

शुक्रबार ब्रेन्ट क्रुडको फ्युचर्स मूल्य १.०५ डलर अर्थात् १ प्रतिशतले बढेर १०८.६८ डलर प्रति ब्यारेल पुगेको छ। अमेरिकी डब्लूटीआई क्रुडको मूल्य पनि ९५ सेन्ट अर्थात् १ प्रतिशतले बढेर १०३.४५ डलर पुगेको छ। बिहीबार मात्रै दुवै प्रमुख बेन्चमार्कको मूल्य ६ प्रतिशतभन्दा बढी बढेको थियो। 

साप्ताहिक आधारमा भने ब्रेन्ट र डब्लूटीआई दुवैको मूल्य करिब १३ प्रतिशतले वृद्धि भएको छ, जुन जुलाई १७ मा समाप्त भएको सातायता सबैभन्दा तीव्र साप्ताहिक वृद्धि हो। इरान समर्थित हुथी विद्रोहीले बिहीबार यमनको मोखा बन्दरगाह नियन्त्रणमा लिएपछि लाल सागरको ढुवानीमा थप जोखिम बढेको छ। यस्तै, खाडी क्षेत्रमा हर्मोज जलडमरूमध्य हुँदै हुने आवागमन सीमित हुनुका साथै ट्याङ्करमाथिका आक्रमणसमेत बढेका छन्।

यमनबाट साउदी अरबका ऊर्जा पूर्वाधारमा भएका आक्रमणले द्वन्द्व इरान र हर्मोज जलडमरूमध्यभन्दा बाहिरसमेत फैलिन थालेको संकेत गरेको विश्लेषण गरिएको छ। यसैबीच, अमेरिकी राष्ट्रपति डोनाल्ड ट्रम्पले इरानको नातान्ज युरेनियम संवर्द्धन केन्द्रनजिकै रहेको पिकएक्स माउन्टेनमा आक्रमण हुनसक्ने चेतावनी दिएका छन्। उनले युद्ध नोभेम्बरमा हुने मध्यावधि निर्वाचनपछि मात्रै अन्त्य हुनसक्ने बताएका छन्।

विश्लेषकहरूका अनुसार तेलको मूल्यमा देखिएको यो उछाल कति समय टिक्छ भन्ने कुरा विश्वकै सबैभन्दा ठूलो कच्चा तेल आयातकर्ता चीनको मागमा समेत निर्भर रहनेछ। चीनले तेल खरिद बढाएमा आपूर्ति अवरोधको प्रभाव अझ गहिरिन सक्ने उनीहरूको आकलन छ। यसैबीच, अमेरिकामा राष्ट्रिय औसत डिजेलको मूल्य पनि पहिलोपटक प्रति ग्यालन ६ डलरभन्दा माथि पुगेको छ।

- एजेन्सी