कैलाली कारागारबाट भागेका ११८ कैदीबन्दी फर्किए, ५ सय अझै फरार

---

नयाँ पेज

२०८२ भदौ ३० सोमबार ११:०८ बजे

धनगढी । भदौ २४ गतेको जेनजी आन्दोलनका क्रममा कैलाली कारागारबाट भागेका १ सय १८ कैदीबन्दी फर्किएका छन् । 

कैलाली कारागारका जेलर चिरञ्जीवी सापकोटाका अनुसार आइतबार मात्रै १५ जना महिला कैदी कारागारको सम्पर्कमा आएका थिए ।

कारागार प्रशासनले सबै कैदीलाई फर्कन सूचना जारी गरेपछि उनीहरू कारागारको सम्पर्कमा आउन थालेका हुन् ।

कतिपयलाई भाग्ने क्रममा पनि प्रहरीले पक्राउ गरेको छ । जेलर सापकोटाका अनुसार दाङबाट दुईजना र दार्चुलाबाट दुईजना पक्राउ परेका छन् ।

यस्तै, बझाङबाट पनि दुई जना पक्राउ परेका छन् । भाग्ने क्रममा घाइते भएका उनीहरूको हाल उपचार भइरहेको छ ।

यस्तै एक जना भारतीय कैदी पनि सम्पर्कमा आएका छन् । अन्यको पनि खोजी भइरहेको प्रहरीले जनाएको छ । 

कैलाली कारागारमा ६ सय १८ कैदी थिए । आन्दोलनका क्रममा प्रदर्शनकारी कारागार प्रवेश गरेपछि सबै कैदी फरार भएका हुन् ।