.gif)
 (1).png){kind=logo}
.png)
कांग्रेस बागमती : बानियाँले दिए उम्मेदवारी, मुख्यमन्त्री लामासँग प्रतिष्पर्धा
चितवन । नेपाली कांग्रेसको बागमती संसदीय दलको नेता चयनका लागि निर्वाचन प्रक्रिया सुरु भएको छ । दलको नेता पदका लागि इन्द्रबहादुर बानियाँले उम्मेदवारी दिएका छन् । मकवानपुरबाट निर्वाचित प्रदेश सांसद बानियाँले बुधबार बिहान बागमती प्रदेश सभा भवन परिसरमा उम्मेदवारी दर्ता गराएका हुन् । सांसद याङ्किला शेर्पा समर्थक तथा कृष्णकुमार तामाङको प्रस्तावमा बानियाँले उम्मेदवारी दर्ता गराएका हुन् ।
हिजो साउन १३ गते मुख्यमन्त्री बहादुरसिंह लामाविरुद्ध कांग्रेस प्रदेश संसदीय दलमा अविश्वासको प्रस्ताव पारित भएपछि उनले दल नेताको हैसियत गुमाएका छन् । संसदीय दलको नेतामा मुख्यमन्त्री बहादुरसिंह लामा र इन्द्रबहादुर बानियाँबीच प्रतिस्पर्धा हुने भएको छ ।
लामाको अविश्वासको प्रस्ताव दर्ता गरेका सांसदहरूले पहिले नै बानियाँलाई दलको नेता र मुख्यमन्त्रीको लागि निक्र्यौल गरे पनि संसदीय दलको नेताबाट आउट भएका मुख्यमन्त्री लामा भने प्रतिष्पर्धामा आउने नआउने बताएका थिएनन् ।
उनले आफ्नो तर्फबाट ललितपुरबाट प्रदेश सांसदमा प्रतिनिधित्व गरेका रामकृष्ण चित्रकारलाई प्रस्ताव गरेका थिए । तर, आफ्नो विपक्षमा रहेका सांसदहरूलाई आफूतर्फ तान्ने प्रयास गरिरहेका मुख्यमन्त्री लामाले अन्ततः आफै संसदीय दलको नेतामा प्रतिष्पर्धा गर्ने निर्णय गरेका छन् ।
कांग्रेस बागमती प्रदेशको संसदीय दलको नेताको निर्वाचन अहिले १० बजेदेखि सुरु भएको छ । १० देखि ११ बजेसम्म नामावली प्रकाशन गरेपछि ११ः३० देखि १२ बजेसम्म उम्मेदवारी दर्ताको समय रहेको संसदीय दलका सचिव कृष्ण तामाङले जानकारी दिएका छन् ।
सोही तालिका अनुसार सकेसम्म पाँचै जना मन्त्री टुङ्ग्याएर शपथ समेत खुवाएर मनोनयन दर्ता गर्न जाने तयारी मुख्यमन्त्री लामाले गरेका छन् । संसदीय दलको नेतामा लामाका तर्फबाट उम्मेदवार बन्ने चर्चा रहेका सांसद रामकृष्ण चित्रकारले जित्ने निश्चित भएका कारण मुख्यमन्त्री लामा नै संसदीय दलको नेतामा उम्मेदवार बन्ने निर्णय भएको नेपाल बताएका छन् ।
उनले भने, ‘संसदीय दलको नेतामा म उठ्ने कि भन्ने थियो । तर, जित निश्चित भएका कारण फेरि मुख्यमन्त्री ज्यू नै उम्मेदवार बन्ने निश्चित भएको छ । उहाँले नै उम्मेदवारी दिनुहुन्छ ।’ सांसद चित्रकारले सकेसम्म पाँच जना मन्त्री आजै टुङ्गो लगाउने नभए निश्चित भएका तीन जनाको शपथ आजै खुवाउने पनि जानकारी दिए ।
नेपाली कांग्रेस बागमती प्रदेश सहमहामन्त्री हरिशरण श्रेष्ठको नेतृत्वमा गठित निर्वाचन समितिले आजै निर्वाचन र दलको नेता घोषणा गर्ने तालिका सार्वजनिक गरेको छ । मुख्यमन्त्री बहादुरसिंह लामाले तीन जना मन्त्री नियुक्त गरेका छन् । मुख्यमन्त्री लामाले बुधबार गोविन्द लम्साल, माया श्रेष्ठ र गीता गुरुङलाई मन्त्री नियुक्त गरेका हुन् । मुख्यमन्त्री लामाले पाँच वटै मन्त्रालयका मन्त्री नियुक्तिको तयारी गरेका छन् ।
