.gif)
 (1).png){kind=logo}
.png)
नेपालमा ८ हजार मिटर भन्दा अग्ला १४ हिमाल
०४:१८ बजे
थप भएका आठ हजारभन्दा अग्ला हिमालमा सोलुखुम्बुको ल्होत्सेसार (८४०४ मिटर), ताप्लेजुङमा पर्ने यालुङ काङ (८५०५ मिटर), कञ्चनजंघा साउथ (८४७६ मिटर), कन्चनजंगा सेन्ट्रल (८४७३ मिटर, ल्होत्से मिडिल (८४१० मिटर) र यालुङ काङ बेस्ट (८०७७ मिटर) छन् । यसअघिसम्म सगरमाथा (८८४८ मिटर), कञ्चनजंघा (८५८६ मिटर), ल्होत्से (८५१६ मिटर), मकालु ( ८४६३ मिटर), छ्यो यु (८२०१ मिटर), धौलागिरि प्रथम (८१६७ मिटर), मनास्लु (८१५६ मिटर), अन्नपूर्ण प्रथम ( ८०९१ मिटर) सूचीकृत भएका थिए ।
विभागले थप भएका हिमालको नामसहित अक्षांश, देशान्तर, उचाइ र हिमाल रहेको स्थानको विस्तृत विवरणसहित सूचीकरण गरेको विभागका प्रवक्ता लक्ष्मण शर्माले बताए । आरोहणका लागि खुला गरिसकेका १४ अग्ला हिमालमध्ये यालुङ काङ बेस्ट (८०७७ मिटर) बाहेक सबैमा आरोहण भइसकेको शर्माले बताए । विश्वभरमा आठ हजार मिटरभन्दा अग्ला हिमालको संख्या अब २० पुगेको छ ।
नेपालबाहिरका हिमालमा पाकिस्तानको केटु (८६११ मिटर), नांगा पर्वत ( ८१२६ मिटर), गसेरब्रुम प्रथम (८०६८ मिटर), ब्रोड पिक (८०४७ मिटर), गसेरब्रुम दोस्रो (८०३५ मिटर) र चीनको सिसापाङमा (८०२७ मिटर) छन् । ०७१ वैशाख २५ गतेको मन्त्रिपरिषद् बैठकले निर्णय गरी ५८०० मिटरभन्दा होचा हिमाल आरोहण अनुमति लिनु नपर्ने व्यवस्था गरेको छ । यता, सरकारले हालसम्म चार सय १४ वटा हिमाललाई आरोहणका लागि खुला गरेको छ । १६ वटा हिमाललाई हटाएको छ भने अझै ९२ वटा हिमाल आरोहण हुन सकेको छैन ।
आरोही तेन्जिङ नोर्गे शर्पा र एड्मन्ड हिलारीले २०१० जेठ १६ गते सगरमाथाको सफल आरोहण गरेपछि नेपाली इतिहासमा प्रत्यक्ष रूपमा हिमालसँग मानव सम्बन्ध जोडिएको हो । यी अग्ला हिमाललाई विश्वव्यापी मान्यता दिन मागसहित इन्टरनेसनल क्लाइम्बिङ एन्ड माउन्टेनेरिङ फेडेरेसनमा निवेदन दिइसकेको फेडेरेसनका मानार्थ सदस्य एवं हिमालविज्ञ आङछिरिङ शेर्पाले बताए ।
विभागको तथ्यांकअनुसार २०१६ सम्ममा अग्ला हिमालमध्ये सबैभन्दा धेरै आरोहण गर्नेमा सगरमाथामा ४८७९ जना, मनास्लुमा १३५९, ल्होत्से ५५९, धौलागिरि प्रथममा ४७८, मकालु ४७४, कञ्चनजंघामा ३४४, अन्नपूर्ण प्रथममा २६७, यालुङ काङमा ५३ र छ्यो यू मा १४ ले आरोहण गरिसकेका छन् । स्रोतः अन्नपूर्ण पोष्ट 
