.gif)
 (1).png){kind=logo}
.png)
बागमतीमा एमाले, नेकपा र राप्रपाबीच सहमति, भागबन्डादेखि सरकार सञ्चालन संयन्त्रसम्म
काठमाडौं : बागमती प्रदेशमा सत्तारूढ नेकपा एमाले, नेकपा र राष्ट्रिय प्रजातन्त्र पार्टी (राप्रपा)बीच सरकार सञ्चालनका लागि ६ बुँदे सहमति भएको छ। मुख्यमन्त्री किरण थापामगरसहित तीन दलका संसदीय दलका नेताबीच मंगलबार भएको सहमतिमा समृद्ध बागमती प्रदेश निर्माणका लागि साझा प्रतिबद्धता व्यक्त गर्ने उल्लेख छ।
सहमतिअनुसार प्रदेशमा ८ वटा भन्दा बढी मन्त्रालय नबनाउने र मन्त्रालयको भागबन्डा गर्ने निर्णय भएको छ। त्यस्तै, सभामुख नेकपाबाट निर्वाचित गर्ने सहमति भएको छ। सरकार सञ्चालनका लागि ७ दिनभित्र न्यूनतम साझा कार्यक्रम तयार गरिने भएको छ। त्यसका लागि तीनै दलको प्रतिनिधित्व रहने गरी ७ सदस्यीय समिति गठन गरिएको छ।
यस्तै, सरकार सञ्चालनका लागि संयन्त्र गठन गर्ने र सुरुमा त्यसको नेतृत्व नेकपाले गर्ने सहमति भएको छ। मन्त्रिपरिषद्लाई महिला सहभागितासहित समावेशी बनाउने तथा मर्यादाक्रममा मुख्यमन्त्रीपछि नेकपा र त्यसपछि राप्रपा रहने व्यवस्था गरिएको छ। सहमति पत्रमा मुख्यमन्त्री थापामगर, नेकपा संसदीय दलका नेता शालिकराम जम्कट्टेल, एमाले संसदीय दलका नेता जगन्नाथ थपलिया र राप्रपा संसदीय दलका नेता उद्धव थापाले हस्ताक्षर गरेका छन्।
यसअघि राप्रपाभित्रै विवादका बीच बागमतीमा नयाँ सरकार गठन भएको थियो। पार्टीले संसदीय दलका नेता उद्धव थापासहित चार सांसदलाई कारबाहीसमेत गरेको थियो।
