मलेसियामा एसियन गेम्स महिला छनोट आजबाट, नेपालको पहिलो खेल चीनविरुद्ध

पहिलो खेल खेल्न लागेको नेपाललाई पराजित गर्ने रणनीतिमा चीन

---

नयाँ पेज

२०८३ जेठ १३ बुधबार ०९:०९ बजे

काठमाडौँः एसियन गेम्स महिला छनोट प्रतियोगिताअन्तर्गत नेपाली राष्ट्रिय महिला क्रिकेट टोलीले आज बुधबार आफ्नो पहिलो खेल खेल्दै छ। मलेसियाको क्वालालम्पुरस्थित वायोमास ओभल मैदानमा हुने यस रोमान्चक भिडन्तमा नेपाली टोलीले चीनको सामना गर्न लागेको हो। खेल नेपाली समय अनुसार बिहान पौने १२ बजे सुरु हुने तय भएको छ।

प्रतियोगितामा चीनले यसअघि नै विजयी सुरुवात गरिसकेको छ। आफ्नो पहिलो खेलमा इन्डोनेसियालाई ३ विकेटले स्तब्ध बनाएको चिनियाँ टोली आज नेपाललाई समेत पाखा लगाउँदै आफ्नो जितको यात्रालाई निरन्तरता दिने दाउमा छ।

अर्कोतर्फ, नेपाली महिला टोली भने चीनविरुद्ध मैदान उत्रिँदै यस प्रतियोगिताको सुखद सुरुवात गर्ने लक्ष्यमा रहनेछ। नेपालको यो प्रतियोगिताकै पहिलो खेल हो। समूह 'बी' मा रहेको नेपालले आफ्नो दोस्रो खेलमा भोलि बिहीबार इन्डोनेसियाको सामना गर्ने तालिका छ।

यस समूहमा कूल तीनवटा टोलीहरू मात्र सहभागी छन्। समूह चरणको समाप्तीपछि उत्कृष्ट प्रदर्शन गर्ने शीर्ष २ टोलीहरूले प्रतियोगिताको सेमिफाइनलमा आफ्नो स्थान सुरक्षित गर्नेछन्। त्यस्तै, प्रतियोगिताको समूह 'ए' मा भने आयोजक राष्ट्र मलेसियासहित हङकङ र थाइल्यान्ड प्रतिस्पर्धा गरिरहेका छन्।