.gif)
 (1).png){kind=logo}
.png)
डोल्पाका पाटन जेठ १० देखि खुल्ने, यार्सा टिप्न जानेले यी नियम पालना गर्नुपर्ने
काँक्रेविहार (सुर्खेत) : बहुमूल्य जडीबुटी यार्सागुम्बा सङ्कलनका लागि डोल्पाका उच्च हिमाली पाटनहरू आगामी जेठ १० गतेदेखि खुला गरिने भएको छ। आज बसेको सर्वपक्षीय तथा सर्वदलीय बैठकले शे–फोक्सुण्डो राष्ट्रिय निकुञ्ज र डिभिजन वन क्षेत्र अन्तर्गतका सम्पूर्ण पाटनहरूमा एकैसाथ सङ्कलन कार्य सुरु गर्ने निर्णय गरेको हो। निकुञ्जका निमित्त कार्यालय प्रमुख विज्ञान सेनका अनुसार यस वर्षको सिजनका लागि सुरक्षा र व्यवस्थापनका सम्पूर्ण तयारीहरूलाई तीव्र पारिएको छ।
यार्सा सङ्कलनका लागि निकुञ्जले सङ्कलनकर्ताको भौगोलिक अवस्थितिका आधारमा तीन तहको प्रवेश शुल्क निर्धारण गरेको छ। जसअन्तर्गत निकुञ्जको मध्यवर्ती क्षेत्रका बासिन्दाले ५०० रुपैयाँ, डोल्पा जिल्लाका अन्य नागरिकले दुई हजार रुपैयाँ र जिल्ला बाहिरबाट आउने सङ्कलनकर्ताले तीन हजार रुपैयाँ शुल्क बुझाउनुपर्नेछ। सहुलियत शुल्कको सुविधा लिनका लागि मध्यवर्ती क्षेत्र र जिल्लाभित्रका बासिन्दाले अनिवार्य रूपमा आफ्नो परिचयपत्र पेश गर्नुपर्ने व्यवस्था गरिएको छ। यदि परिचयपत्र नभएमा उनीहरूले पनि जिल्ला बाहिरका नागरिक सरह नै तीन हजार रुपैयाँ शुल्क तिर्नुपर्ने निकुञ्ज प्रशासनले स्पष्ट पारेको छ।
महत्त्वपूर्ण जानकारी र प्रतिबन्ध
-
शुल्क बुझाउने मिति: सङ्कलनकर्ताले जेठ ५, ६ र ७ गतेभित्र सम्बन्धित क्षेत्रमा पुगेर प्रवेश शुल्क बुझाई अनुमति पत्र लिइसक्नुपर्नेछ।
-
बालबालिकालाई निषेध: सुरक्षा र जोखिमलाई ध्यानमा राख्दै १६ वर्षभन्दा कम उमेरका बालबालिकालाई यार्सा पाटन प्रवेशमा पूर्ण रोक लगाइएको छ।
-
जनजीवन: यार्सा सिजन सुरु भएसँगै डोल्पा, जाजरकोट र रुकुम पश्चिम लगायतका जिल्लाबाट ठुलो सङ्ख्यामा मानिसहरू घर नै खाली गरेर हिमाली पाटनतर्फ लाग्ने गर्दछन्।
पाटन प्रवेशका लागि जेठ ५, ६ र ७ गतेभित्र तोकिएको स्थानमा शुल्क बुझाई अनुमति पत्र लिइसक्नुपर्नेछ। सङ्कलनको समयमा हुनसक्ने सम्भावित जोखिम र सुरक्षालाई मध्यनजर गर्दै निकुञ्जले १६ वर्षभन्दा कम उमेरका बालबालिकालाई पाटन प्रवेशमा पूर्ण रूपमा निषेध गरेको छ। हरेक वर्ष यार्सागुम्बा टिप्ने सिजन सुरु भएसँगै डोल्पा, जाजरकोट र रुकुम पश्चिम लगायतका छिमेकी जिल्लाहरूबाट हजारौँको सङ्ख्यामा मानिसहरू आफ्ना घरमा ताला लगाएर हिमाली भेगतर्फ लाग्ने गर्दछन्, जसले गर्दा यस क्षेत्रका गाउँबस्तीहरू नै सुनसान हुने गरेका छन्।
