.gif)
 (1).png){kind=logo}
.png)
भूकम्पपीडित बालकलाई रोनाल्डोको सन्देश- ‘म तिमीलाई भेट्न चाहन्छु’
एजेन्सी । केही विपत्तिले मानिसको जीवनलाई एकैछिनमा बदलिदिन्छन्। भेनेजुएलामा आएको विनाशकारी भूकम्पले आन्द्रेस मिएलेसको जीवनमा पनि त्यस्तै पीडा थप्यो। उनले आफ्ना बाआमा गुमाए। गम्भीर घाइते भएपछि चिकित्सकले उनको एउटा खुट्टा काट्नुपर्यो। बाल्यकालमै उनले कल्पनासमेत नगरेको पीडा भोग्नुपर्यो।
तर, त्यही पीडाको बीचमा विश्व फुटबलका महान् खेलाडी क्रिस्टियानो रोनाल्डोबाट आएको एउटा भिडियो सन्देशले उनको अनुहारमा फेरि मुस्कान फर्काइदियो।
रोनाल्डोले भिडियोमार्फत आन्द्रेसलाई सम्बोधन गर्दै भने, 'हेलो आन्द्रेस, म तिमीलाई ठूलो अँगालो पठाइरहेको छु। मलाई थाहा छ, तिमी मेरो ठूलो समर्थक हौ। बलियो बनिराख। आफ्नो सपना कहिल्यै नछोड। तिमी निको भएपछि म तिमीलाई मेरो खेल हेर्न निमन्त्रणा गर्न चाहन्छु। म तिमीलाई भेट्न चाहन्छु।'
आफ्नो आदर्श खेलाडीबाट यस्तो सन्देश पाएपछि अस्पतालको शय्यामा रहेका आन्द्रेस भावुक बने। आँखा रसाएका उनी मुस्कुराउँदै भिडियो हेर्दै थिए। उक्त दृश्य अहिले सामाजिक सञ्जालमा लाखौँ मानिसको मन छुने सामग्री बनेको छ।
आन्द्रेसको कथा सार्वजनिक भएपछि विश्वभरबाट सहानुभूति र सहयोगको लहर चलेको छ। धेरैले उनको उपचार, कृत्रिम खुट्टाको व्यवस्था र भविष्यका लागि आर्थिक सहयोग जुटाउने अभियानसमेत थालेका छन्।
मैदानमा गोल गरेर समर्थकलाई खुसी दिने रोनाल्डोले यसपटक भने एउटा सन्देशमार्फत पीडाले थलिएको बालकको मन जितेका छन्। उनको यो व्यवहारले महान् खेलाडी हुनु भनेको केवल मैदानमा उत्कृष्ट प्रदर्शन गर्नु मात्र होइन, कठिन अवस्थामा परेकाहरूको मनोबल पनि बढाउनु हो भन्ने सन्देश दिएको छ।
आन्द्रेसको जीवनमा बाआमाको अभाव कहिल्यै पूरा हुन सक्दैन। गुमेको खुट्टा पनि फर्किने छैन। तर, संसारकै चर्चित फुटबल खेलाडीले ‘म तिमीलाई भेट्न चाहन्छु’ भनेर दिएको आश्वासनले भने उनको भविष्यप्रतिको आशा र आत्मविश्वासलाई नयाँ ऊर्जा दिएको छ।
