महाशिवरात्रिका अवसरमा पशुपतिनाथ र देशभर शिवालयमा भक्तजनको घुइँचो

---

नयाँ पेज

२०८२ फाल्गुण ३ आइतबार १६:२३ बजे

काठमाडौँ : महाशिवरात्रि पर्वको अवसरमा पशुपतिनाथसहित देशभरका शिवालयमा भक्तजनको लामो घुइँचो लागेको छ । भक्तजन बिहानैदेखि देवाधिदेव महादेवको पूजा आराधना र दर्शनका लागि जम्मा भएका हुन् । 

शास्त्रीय वचनअनुसार, फाल्गुन कृष्ण चतुर्दशीका दिन मध्यरातमा भगवान शिव रुद्ररूप धारण गर्दै पूजा, आराधना र दर्शन गर्नेले यस लोकमा सुख शान्ति र परलोकमा सद्गति प्राप्त गर्ने विश्वास गरिन्छ । यसका आधारमा भक्तजनहरूले आज बिहानदेखि पशुपतिनाथ र अन्य शिवालयमा पूजा आराधना गर्दै शिवजीको दर्शन गरेका छन् ।

पशुपतिनाथका चारवटा ढोका आइतबार बिहान दुई बजेदेखि नै खुला गरिएको थियो । कोषले भक्तजनको सहज दर्शनका लागि तीनवटा लाइन व्यवस्था गरेको छ । विभिन्न मार्गमार्फत भक्तजनलाई पशुपति मन्दिर प्रवेश गर्नका लागि व्यवस्था मिलाइएको छ । प्रमुख मार्गहरुमा मित्रपार्क, गौरीघाट, रुद्रगाडेश्वर, बत्तिसपुतली र तिलगङ्गा लगायतका स्थानहरू रहेका छन् ।

शिवरात्रि पर्वको महत्व धार्मिक विश्वास अनुसार अत्यधिक छ । यस दिन स्नान गरी भगवान शिवको पूजा गर्ने भक्तजनको मान्यता अनुसार, यसले रोग व्याधि हटाउने र सुख–शान्ति दिने छ ।

यस अवसरमा पशुपतिनाथ क्षेत्रमा विभिन्न पूजा, आराधना र विशेष धार्मिक कार्यक्रमहरू आयोजना गरिएको छ । चार प्रहरमा चार प्रकारका पूजाका साथै महादीप, अखण्डदीप, दीपोत्सव र लक्षबत्तीका साथ लाख बेलपत्र अर्पण गरिने परम्परा रहेको छ ।

पशुपतिनाथको दर्शनका लागि दर्शनार्थीको भारी भीड रहेको छ र सवारी पार्किङका लागि सिफल, तिलगङ्गा, कोषको कार्यालय, वनकाली लगायत स्थानमा व्यवस्था मिलाइएको छ ।

महाशिवरात्रि पर्वलाई लक्षित गर्दै, क्रिएसन नेपालले सफा गरौं अभियानअन्तर्गत पशुपतिनाथ क्षेत्रमा पाँचसयभन्दा बढी सफाइकर्मी परिचालन गरेको छ ।