ए.. दोस्ती हम नहीँ तोडेङ्गे...

---

नयाँ पेज

२०८२ मङ्सिर ९ मंगलबार ११:३७ बजे

काठमाडौं : प्रसिद्ध बलिउड अभिनेता अमिताभ बच्चन र धर्मेन्द्रको जोडी हिन्दी फिल्मका लागि सर्वाधिक सफल जोडी रह्यो । 

यी दुवै दिग्गज अभिनेताले अभिनय गरेको चलचित्र ‘सोले’ दसकौँपछि पनि मानिसहरूको मन मस्तिष्कमा ताजा छ ।

धर्मेन्द्र र अमिताभ बच्चनले कल्ट फिल्म शोलेमा जय र वीरूको अमर भूमिका निर्वाह गरेका थिए । सोलेको यो गीत ‘ए.. दोस्ती हम नहीँ तोडेङ्गे, तोडेङ्गे दम मगर तेरा साथ नहीँ छोडेङ्गे’ मानिसहरूको जिब्रोमा अझै पनि झुन्डिरहन्छ ।

उनै प्रसिद्ध अभिनेता धर्मेन्द्रकोसोमबार निधन भयो । आफ्ना परम मित्र धर्मेन्द्रको निधनप्रति अमिताभ बच्चनले सामाजिक सञ्जालमार्फत गहिरो दुःख प्रकट गरेका छन् ।

सोमबार राति अमिताभ बच्चनले एक्समा लेखे, ‘अर्को एक बहादुर दिग्गजले हामीलाई छोडेर गएका छन्। उनले स्टेज छोडेका छन्। उनले असह्य प्रतिध्वनियुक्त मौनता छोडेका छन्। धरम जी...।’

अमिताभ अगाडि लेख्छन्, ‘उहाँ महानताको प्रतीक हुनुहुन्थ्यो। उहाँ आफ्नो प्रभावशाली उपस्थितिको लागि मात्र नभई आफ्नो विशाल हृदय र सरलताको लागि पनि परिचित हुनुहुन्थ्यो... उहाँले आफू आएको पञ्जाब गाउँको माटोको सरलता आफूसँगै ल्याउनुभयो ।’

अमिताभको नजरमा धर्मेन्द्र आफ्नो शानदार यात्राभरि आफ्नो चरित्रप्रति इमान्दार रहे । हरेक दशकमा परिवर्तन हुने फिल्म क्षेत्रको बाहुल्यतामा पनि उनी आफ्नो उत्कृष्ट करियरसँग एकरूप रहे । क्षेत्र परिवर्तन भइरह्यो, तर उनी परिवर्तन भएनन्।

अमिताभ लेख्छन्, ‘उहाँको मुस्कान, उहाँको अनुग्रह र उहाँको न्यानोपन सबैमा पुग्यो। यो पेशामा यो दुर्लभ छ । हाम्रो वरिपरि एउटा शून्यता छ । कहिल्यै भरिने शून्यता छैन। प्रार्थना ।’

धर्मेन्द्रको अन्तिम संस्कार सोमबार दिउँसो १ः२० बजे मुम्बईको विले पार्लेस्थित पवन हंस श्मशानघाटमा गरिएको थियो।

सो समयमा उनका नजिकका साथीहरू उपस्थित थिए। धर्मेन्द्र ८९ वर्षका थिए र केही समयदेखि बिरामी थिए।

सन् १९६० मा अभिनय यात्रा सुरु गरेका धर्मेन्द्रले आफ्नो पाँच दशकभन्दा लामो करियरमा ३०० भन्दा बढी चलचित्रहरूमा काम गरेका छन्, जसले उनलाई बलिउडका ‘ही म्यान’को उपनाम दिएको छ।

पंजाबको लुधियाना जिल्लामा ८ डिसेम्बर १९३५ मा जन्मेका धर्मेन्द्रले फिल्मफेयर पत्रिकाको नयाँ प्रतिभा पुरस्कार जितेर मुम्बईको यात्रा तय गरेका थिए। उनले सन् १९६० मा ‘दिल भी तेरा हम भी तेरे’ बाट डेब्यू गरेका थिए। १९६६ को एक्सन फिल्म ‘फूल और पत्थर’ उनको एकल नायकको पहिलो एक्सन चलचित्र बन्यो। जसले उनलाई पहिलो पटक सर्वश्रेष्ठ अभिनेताका लागि फिल्मफेयर नामांकन दिलायो र सो वर्षको सर्वाधिक कमाई गर्ने चलचित्र बनेको थियो।

उनले मीना कुमारीसँग ‘फूल और पत्थर’ जस्ता सात सफल चलचित्रमा काम गरेका थिए। अभिनेत्री हेमा मालिनीसँगको उनको जोडी सबैभन्दा सफल रह्यो, जससँग उनले ‘शोले’ ‘सीता और गीता’ जस्ता धेरै हिट फिल्महरू दिए र पछि उनीसँगै विवाह पनि गरे।

हृषिकेश मुखर्जी निर्देशित ‘सत्यकाम’मा उनको अभिनयको समीक्षकहरूले अत्यधिक प्रशंसा गरेका थिए। १९७५ को ऐतिहासिक फिल्म ‘शोले’ मा वीरूको रूपमा उनको भूमिका अविस्मरणीय छ, जसलाई आज पनि सबै समयका शीर्ष २५ हेर्नै पर्ने बलिउड चलचित्रहरूमा सूचीकृत गरिएको छ।

उनले १९९७ मा हिन्दी सिनेमामा गरेको अतुलनीय योगदानको लागि फिल्मफेयर लाइफटाइम अचिभमेन्ट अवार्ड प्राप्त गरेका थिए भने सन् २०१२ मा भारत सरकारले उनलाई देशको तेस्रो सर्वोच्च नागरिक सम्मान पद्मभूषणबाट सम्मानित गरेको थियो।

उनले सन् १९५४ मा १९ वर्षको उमेरमा प्रकाश कौरसँग पहिलो विवाह गरेका धमेन्द्रले उनीबाट दुई सफल अभिनेता छोराहरू सनी देओल र बबी देओलर दुई छोरीहरू छन्। दोस्रो विवाह उनले अभिनेत्री हेमा मालिनीसँग विवाह गरेका थिए। जसबाट उनीहरूका दुई छोरीहरू, अभिनेत्री ईशा देओल र आहना देओल छन्।

निर्माताको रूपमा उनले ‘विजयता’ फिल्म्स नामक निर्माण कम्पनी स्थापना गरेर आफ्ना छोराहरूलाई चलचित्र क्षेत्रमा ल्याएका थिए। यस कम्पनीले ‘घायल’ जस्ता समीक्षक र व्यावसायिक रूपमा सफल फिल्महरू पनि निर्माण गरेको छ। जसले राष्ट्रिय फिल्म पुरस्कार समेत जितेको थियो।

पछिल्लो समय अभिनय बाहेक धर्मेन्द्रले राजनीतिमा पनि कदम राखेका थिए। उनी भारतीय जनता पार्टी भाजपाको तर्फबाट सन् २००४ देखि २००९ सम्म राजस्थानको बीकानेर निर्वाचन क्षेत्र को प्रतिनिधित्व गर्दै १५ औं लोकसभाको सदस्य बनेका थिए।

उनले २००७ मा ‘लाइफ इन अ मेट्रो’ र ‘अप्ने ’ मार्फत चलचित्र क्षेत्रमा सफल पुनरागमन गरेका थिए। धर्मेन्द्रले ‘यमला पगला दीवाना’ फ्रेन्चाइज र रियालिटी शो ‘इन्डियाज गट ट्यालेन्ट’ को निर्णायकको रूपमा पनि काम गरेका थिए।

आज धर्मेन्द्रको मृत्यु भएसँगै उनको जीवनले कला, साहस र समर्पणको एक अविस्मरणीय विरासत छोडेको छ।