.gif)
 (1).png){kind=logo}
.png)
हमासले रिहा गर्ने जीवित २० बन्धकको सूचीमा छैनन् विपिन
काठमाडौं । हमासले आज (सोमबार) आफ्नो कब्जामा रहेका २० जना बन्धकलाई रिहा गर्दैछ । तर, हमासको नियन्त्रणमा रहेका नेपाली विद्यार्थी विपिन जोशीको नाम भने रिहा हुने सूचीमा छैन ।
हमासको सैन्य शाखाले २० जना जीवित बन्धकहरूको नाम सार्वजनिक गरेको हो ।
द टाइम्स अफ इजरायलका अनुसार समूहमा अपहरण गरिएका सिपाही तामिर निम्रोदी र नेपाली नागरिक विपिन जोशीको नाम छैन।
अमेरिकाको मध्यस्थतामा इजिप्टमा भएको वार्तामा इजरायल र हमासबीच भएको सम्झौताअनुसार आज सोमबार त्यहाँको समय दिउँसो १२ बजे अर्थात् यहाँको समय भने दिउँसो २ः४५ बजेसम्म सबै बन्धक रिहा गरिनुपर्नेछ ।
यसैबीच इजरायलका लागि नेपाली राजदूत धनप्रसाद पण्डितले विपिन जोशी जीवित नरहेको जानकारी पाएको बताएका छन् ।
आफूसहित अमेरिकामा रहेकी विपिनकी बहिनी, नेपालमा रहेका विपिनका दाजु किशोर र इजरायलको प्रधानमन्त्री कार्यालयका दुई अधिकारीहरुलाई भिडियो कन्फरेन्समा जोडेर विपिन जीवित नरहेको औपचारिक जानकारी इजरायलका अधिकारीले दिएको राजदूत पण्डितले बताए ।
अध्ययनको सिलसिलामा इजरायल पुगेका कञ्चनपुरका विपिन जोशी गत अक्टुबर ७ मा हमासले किबुत्ज क्षेत्रमा गरेको आक्रमणको क्रममा बन्धक बनाइएका थिए । सो आक्रमणको क्रममा १० जना नेपाली विद्यार्थीहरु मारिएका थिए । हमास लडाकुहरुले विपिनलाई आफूसँगै लिएर गएका थिए ।
सन् २०२३ नोभेम्बर १७ मा विपिन गाजा क्षेत्रको अल शिफा अस्पतालमा देखिएका थिए । तर त्यसपछि उनको अवस्था अज्ञात थियो । गत बुधबार बेलुका विपिनको एउटा पुरानो भिडियो सार्वजनिक गरिएको थियो ।
विपिनको अवस्था पत्ता लगाउन भन्दै सरकारको पहलमा विपिनकी आमा र बहिनी यसअघि इजरायल गएर फर्किएका थिए । त्यसपछि अहिले उनीहरु अमेरिकामा छन् ।
