.gif)
 (1).png){kind=logo}
.png)
बाढी प्रभावित क्षेत्रमा सफाइ गर्दै काठमाडौँ महानगर
काठमाडौँ: काठमाडौँ महानगरपालिकाले बाढी प्रभावित क्षेत्रमा सरसफाइ सुरु गरेको छ।
शुक्रबारदेखि परेको अविरल वर्षाका कारण प्रभावित बल्खु, टेकु, विष्णुमती करिडोरलगायत क्षेत्रमा नगर प्रहरी र सफाइकर्मीको सहायताले सफाइ तथा हिलो व्यवस्थापनको काम भइरहेको महानगरले जनाएको छ ।
नगर प्रहरी बलका नायब उपरीक्षक मीनबहादुर थापाका अनुसार आइतबार बिहानदेखि महानगरपालिकाको वातावरण व्यवस्थापन विभागका १०० जना कामदार, तीन वटा जेसिभी, तीन वटा जेट मेसिन र डम्पर प्रयोग गरी प्रभावित क्षेत्रमा काम भएको छ ।
बल्खु तरकारी बजार, साझा पेट्रोल पम्प अगाडि, टेकु दोभान, बङ्सीघाट, च्यासल, शङ्खमूल, नरेफाटको लालीगुराँस चोक तथा विष्णुमती कोरिडोर क्षेत्रमा विशेष रूपमा बाढीजन्य सफाइको काम गरिएको थापाले जानकारी दिए । बङ्सीघाट र टेकु दोभान क्षेत्रमा अत्यधिक हिलोका कारण मेसिनले समेत काम गर्न नसक्दा आजको काम अधुरो रहेको उनले बताए।
‘हिलो पूरै पानी पानी भएको छ। साबेलले निकाल्न र मेसिनले समेत सोहोर्न नसक्ने अवस्था छ। त्यसैले आज केही ठाउँमा काम गर्न सकिएको छैन। घाम लागेमा भोलिदेखि बाँकी रहेका सबै काम गर्ने तयारी छ’, थापाले भने।
