११ हजार भोल्टको तार चुँडिएर करेन्ट लाग्दा युवकको मृत्यु

---

नयाँ पेज

००:५० बजे

जनकपुरधाम । महोत्तरीको औरही नगरपालिका–७ भोयल टिमकियास्थित कृषि सडकमा ११ हजार भोटको तार चुँडिएर खस्दा करेन्ट लागेर एक मजदुरको मृत्यु भएको छ ।

मृत्यु हुनेमा महोत्तरीको रामगोपालपुर नगरपालिका–५ कञ्चनपुरका ३२ वर्षीय छटु मुखिया छन् । भोयल टिमकियास्थित कृषि सडकमा कलभर्ट निर्माणको काम गरिरहेका बेला मुखियालाई करेन्ट लागेको हो । उनको घटनास्थलमै मृत्यु भएको स्थानीय रोशनकुमार यादवले जानकारी दिए ।

घटनास्थलमा पुगेको प्रहरीले अहिले अनुसन्धान गरिरहेको छ । विद्युत् प्राधिकरणको लापरबाहीको कारण तार चुँडिएर खस्दा करेन्ट लागेको स्थानीयको भनाइ छ । स्थानीय रोशनकुमार यादवका अनुसार करिब चार वर्षअघि औरहीको पावर हाउस नजिक ११ हजार भोटको तार चुँडिएर खस्दा एक जनाको घाँटी काटिएर मृत्यु भएको थियो ।