.gif)
 (1).png){kind=logo}
.png)
दोस्रो विश्वयुद्धमा बचेको हिटलरको विश्रामस्थल ‘इगल्स नेस्ट’मा भीषण आगलागी
जर्मनी : जर्मनीको बाभारिया राज्यस्थित नाजी इतिहाससँग जोडिएको ऐतिहासिक भवन ‘केहलस्टाइनहाउस’मा शुक्रबार साँझ भीषण आगलागी भएको छ।
‘इगल्स नेस्ट’ नामले परिचित उक्त भवनमा आगलागी भएपछि घटनामा संलग्न रहेको आशंकामा एक जनालाई पक्राउ गरिएको छ।
सन् १९३८ मा नाजी अधिकारीहरूका लागि अतिथिगृहका रूपमा निर्माण गरिएको यो भवनलाई एडोल्फ हिटलर र नाजी अधिकारीहरूले विश्रामस्थलका रूपमा प्रयोग गर्ने गरेका थिए।
दोस्रो विश्वयुद्धको इतिहाससँग जोडिएको उक्त भवन युद्धका क्रममा भएका बमबारीबाट जोगिएको थियो।
प्रहरीका अनुसार बर्चेसगाडेनको ओबरसाल्जबर्गस्थित भवनमा स्थानीय समयअनुसार शुक्रबार राति ९ः१५ बजे आगलागीको सूचना दिने अलार्म बजेको थियो।
सूचना पाएलगत्तै घटनास्थल पुगेका दमकलकर्मीहरूले भवनमा आगोका ठूला ज्वाला उठिरहेको देखेका थिए।
समुद्री सतहबाट करिब एक हजार ८३४ मिटर उचाइमा रहेको भवनसम्म दमकलका गाडी पुर्याउन कठिनाइ भएको बताइएको छ।
दुर्गम र उचाइमा रहेको स्थानमा आगलागी भएकाले नियन्त्रणको प्रयासमा चुनौती देखिएको थियो।
घटनाबारे प्रहरीले आपराधिक अनुसन्धान सुरु गरेको छ। आगलागीको कारण र पक्राउ परेका व्यक्तिको संलग्नताबारे थप विवरण सार्वजनिक हुन बाँकी छ।
ऐतिहासिक महत्त्व बोकेको केहलस्टाइनहाउसलाई हाल पर्यटकीय तथा ऐतिहासिक स्थलका रूपमा संरक्षण गरिएको छ।
नाजी शासनकालसँग सम्बन्धित इतिहासका कारण यो भवन जर्मनीको चर्चित पर्यटकीय गन्तव्यसमेत हो।
