.gif)
 (1).png){kind=logo}
.png)
चीनका लागि प्रस्तावित राजदूत डा.कल्याणराज शर्मा : नेपाल–चीन सम्बन्धका जानकारदेखि अर्थशास्त्रका अध्येता
काठमाडौं : सरकारले नेपाल–चीन सम्बन्धका जानकार तथा अर्थशास्त्री डा.कल्याणराज शर्मालाई चीनका लागि नेपाली राजदूतमा सिफारिस गरेको छ। शुक्रबार बसेको मन्त्रिपरिषद् बैठकले शर्मासहित १३ देशका लागि राजदूतको नाम सिफारिस गरेको हो।
को हुन् डा.कल्याणराज शर्मा ?
चीन मामिलामा लामो समयदेखि अध्ययन, अध्यापन र अनुसन्धान गर्दै आएका शर्मा अर्थशास्त्रका अध्येताका रूपमा समेत परिचित छन्। उनले चीनको सांघाईस्थित फुदान विश्वविद्यालयबाट अर्थशास्त्रमा विद्यावारिधि (पिएचडी) गरेका छन्। उनको अनुसन्धानका प्रमुख क्षेत्र प्रत्यक्ष वैदेशिक लगानी, व्यापार, पर्यटनमा लगानी तथा आर्थिक विकास हुन्।
शर्माको शैक्षिक तथा व्यावसायिक संलग्नता चीनसँग पनि लामो समयदेखि जोडिएको छ। उनले नेपाल–चीन सम्बन्ध, चिनियाँ अर्थतन्त्र, व्यापार प्रणाली तथा चिनियाँ समाज र विदेश नीतिका विषयमा अध्ययन तथा अध्यापन गर्दै आएका छन्। काठमाडौं विश्वविद्यालयको स्कुल अफ म्यानेजमेन्टमा सन् २०१६ देखि चीनमा व्यवसाय सञ्चालनसम्बन्धी पाठ्यक्रम तयारी तथा अध्यापनमा उनी संलग्न छन्। त्यहाँ उनले चिनियाँ संस्कृति, व्यापार प्रणाली, समाज तथा चिनियाँ विदेश नीतिका विषयसमेत अध्यापन गर्दै आएको विवरणमा उल्लेख छ।
चिनियाँ भाषामध्ये मन्दारिनमा धाराप्रवाह बोल्न सक्ने शर्मालाई चीन मामिलाका जानकार प्राज्ञका रूपमा चिनिन्छ। नेपाल–चीन सम्बन्धका विभिन्न विषयमा आयोजित अन्तर्राष्ट्रिय सम्मेलन तथा क्षेत्रीय नीति संवादमा उनले वक्ताका रूपमा सहभागिता जनाउँदै आएका छन्। शर्मा प्राज्ञिक क्षेत्रसँगै सार्वजनिक कूटनीति र उद्यमशीलतामा पनि सक्रिय छन्। उनी नेपाल–चीन फ्रेन्डसिप फोरमका अध्यक्ष हुन्। त्यस्तै, उनी फुदान विश्वविद्यालय पूर्वविद्यार्थी संघ, नेपालका अध्यक्षसमेत रहेका छन्।
सन् २०२२ देखि नेपाल सिनोलोजिष्ट परिषद्को अध्यक्षका रूपमा समेत उनले काम गर्दै आएका छन्। यी संस्थामार्फत नेपाल–चीनबीच शैक्षिक, सांस्कृतिक तथा जनस्तरीय सम्बन्ध विस्तारमा सक्रिय रहँदै आएको उनको परिचय छ। नेपाल–चीन सम्बन्धको प्रवर्द्धन, हिमाली पर्यटन, सांस्कृतिक आदानप्रदान, शैक्षिक सहकार्य तथा सीमापार आर्थिक सम्बन्धका विषयमा पनि शर्मा लामो समयदेखि संलग्न रहँदै आएका छन्।
सरकारले चीनका लागि राजदूतमा नाम सिफारिस गरेसँगै शर्माको दुई दशकभन्दा बढी समयको प्राज्ञिक, व्यावसायिक तथा नेपाल–चीन सम्बन्धसम्बन्धी अनुभव कूटनीतिक जिम्मेवारीसँग जोडिने भएको छ। चीन नेपालको महत्त्वपूर्ण छिमेकी तथा प्रमुख विकास साझेदार भएकाले दुई देशबीच व्यापार, लगानी, पर्यटन, पूर्वाधार, सीमा, कनेक्टिभिटी तथा शैक्षिक–सांस्कृतिक सहकार्यका विषय राजदूतको जिम्मेवारीसँग प्रत्यक्ष जोडिन्छन्।
मन्त्रिपरिषद्को सिफारिसपछि संसदीय सुनुवाइ तथा सम्बन्धित मुलुकबाट एग्रिमो प्राप्त गर्नेलगायतका प्रक्रिया पूरा भएपछि मात्रै उनको नियुक्ति औपचारिक रूपमा टुंगिनेछ।
