मेसीको एमएलएस करिअरमै पहिलोपल्ट चार गोल

---

नयाँ पेज

२०८३ भदौ १४ आइतबार २१:५९ बजे

काठमाडौं। लिओनल मेसीले मेजर लिग सकर (एमएलएस) करिअरमा पहिलोपल्ट एकै खेलमा चार गोल र एक असिस्ट गरेका छन्।

मेसीको उत्कृष्ट प्रदर्शनमा इन्टर मियामीले आइतबार बिहान सम्पन्न खेलमा सीएफ मोन्ट्रियललाई ७–१ को फराकिलो अन्तरले पराजित गरेको छ। मेसीले खेलको ४०औँ मिनेटमा फ्रिकिकमार्फत गोल गर्दै इन्टर मियामीलाई २–१ को अग्रता दिलाएका थिए। योसँगै उनले यस सिजनको १५औँ लिग गोल पूरा गरे।

त्यसपछि ५२औँ मिनेटमा व्यक्तिगत दोस्रो गोल गरेका मेसीले ८३औँ मिनेटमा तेस्रो तथा इन्जुरी टाइमको छैटौँ मिनेटमा चौथो गोल गरे। उनको चौथो गोल पनि फ्रिकिकमार्फत आएको थियो। खेलअघि गोलको दौडमा एफसी डलासका पेटार मुसाभन्दा दुई गोल पछाडि रहेका मेसीले चार गोल थपेसँगै एमएलएस गोल्डेन बुटको दौडमा आफ्नो दाबेदारी थप बलियो बनाएका छन्।

इन्टर मियामीका लागि कार्लोस कासेमिरोले २०औँ मिनेटमा टेलास्को सेगोभियाको कर्नरमा हेडरमार्फत गोल गर्दै सुरुआती अग्रता दिलाएका थिए। यो ३४ वर्षीय मिडफिल्डरको यस सिजनको पहिलो लिग गोल थियो। सेगोभियाले भने आफ्नो दोस्रो एमएलएस सिजनमा करिअरकै उत्कृष्ट नवौँ असिस्ट पूरा गरे।

मोन्ट्रियलका फाबियन हर्बर्सले ३७औँ मिनेटमा गोल गर्दै खेल १–१ को बराबरीमा ल्याएका थिए। यो उनको पनि यस सिजनको पहिलो गोल थियो। तर दोस्रो हाफमा इन्टर मियामीले खेलमा पूर्ण नियन्त्रण जमायो।

लुइस सुआरेजले ८०औँ मिनेटमा मेसीको पासमा गोल गर्दै टोलीको अग्रता ४–१ बनाए। यो सुआरेजको यस सिजनको ११औँ गोल हो भने मेसीका लागि खेलको १०औँ असिस्ट थियो। १८ वर्षीय युवा खेलाडी अलेक्जान्डर शाले ८९औँ मिनेटमा गोल गर्दै इन्टर मियामीको अग्रता ६–१ पुर्‍याए। एमएलएसमा तीन खेल र ३७ मिनेट खेलेपछि उनको यो पहिलो गोल हो।

इन्टर मियामीका गोलरक्षक डेयन सेन्ट क्लेयरले खेलमा तीन बचाउ गरे। जितसँगै इन्टर मियामीले मोन्ट्रियलविरुद्ध लगातार पाँचौँ जित हात पारेको छ।

अगस्ट महिनामा भने इन्टर मियामीले एक जित, दुई हार र दुई बराबरीको नतिजा निकालेको थियो। जुलाईको अन्त्यमा मोन्ट्रियललाई उसकै मैदानमा १–० ले पराजित गरेपछि इन्टर मियामीले फेरि शानदार जित दर्ता गरेको हो।