निश्चल बस्नेतसहित ११ जनामाथि छानबिन गर्न मानव अधिकार आयोगको सिफारिस

---

नयाँ पेज

२०८३ जेठ १३ बुधबार १७:०० बजे

काठमाडौँः राष्ट्रिय मानव अधिकार आयोगले ‘रुटिन अफ नेपाल बन्द’ फेसबुक पेजका सञ्चालक भिक्टर पौडेलका साथै अन्य विभिन्न व्यक्तिहरू विरुद्ध कानुनी अनुसन्धान अगाडि बढाउन सरकार समक्ष आग्रह गरेको छ।

विगत २०८२ साल भदौ २३ र २४ गते भएको ‘जेनजी’ आन्दोलनका बेला मानव अधिकार उल्लंघनका घटनाहरू घटेको भन्दै आयोगले त्यसको सत्यतथ्य पहिल्याउन यसअघि नै एउटा विशेष समिति बनाएको थियो। आयोगकी सदस्य लिली थापाको नेतृत्वमा गठित सोही समितिले विस्तृत अध्ययन पश्चात यी व्यक्तिहरूलाई कारबाहीको दायरामा ल्याउन सिफारिस गरेको हो।

आयोगद्वारा बुधबार (जेठ १३ गते) सार्वजनिक गरिएको प्रतिवेदनमा प्रख्यात युट्युबर भाग्य न्यौपाने, टंक दाहाल, अंकित मल्ल, उमेश बोहरा, शिव यादव, विनोद देउवा, सरु सुनुवार, भीम उपाध्याय र रवि किरण हमालमाथि विस्तृत छानबिन गर्न भनिएको छ।

यस सूचीमा चलचित्र निर्देशक निश्चल बस्नेतको नाम समेत समावेश छ। उक्त आन्दोलनलाई अनियन्त्रित र उग्र बनाउन यी व्यक्तिहरूले भूमिका खेलेको ठहर आयोगको छ।

प्रतिवेदनमा भनिएको छ, 'उनीहरूले प्रदर्शन भड्काउन बल पुर्‍याएको देखिएको छ।' तसर्थ, आन्दोलनलाई उत्तेजित बनाउने कार्यमा संलग्न देखिएकाले उनीहरूमाथि कानुनी दायरामा राखेर थप अनुसन्धान गर्नुपर्ने निष्कर्ष आयोगले निकालेको छ।