.gif)
 (1).png){kind=logo}
.png)
एकीकृत समाजवादीमा वामदेवलाई तेस्रो बरियता
काठमाडौं । नेकपा (एकीकृत समाजवादी) मा वामदेव गौतमले तेस्रो वरियता पाउने भएका छन् । आज (शुक्रबार) आलोकनगरमा नेकपा एकता राष्ट्रिय अभियान र एकीकृत समाजवादीबीच पार्टी एकता गर्ने सहमति पत्रमा हस्ताक्षर भएपछि गौतमको वरीयतामा पनि सहमति भएको उपाध्यक्ष गंगालाल तुलाधरले जानकारी दिए । हाल गौतमलाई वरिष्ठ नेताको जिम्मेवारी दिइएको छ । एकीकृत समाजवादीमा घनेन्द्र बस्नेत, बेदुराम भुसाल र प्रमेश हमाल वरिष्ठ नेता छन् ।
‘पहिलो वरियतामा अध्यक्ष माधवकुमार नेपाल, दोस्रोमा सम्मानित नेता झलनाथ खनाल हुनुहुन्छ । त्यसपछि वामदेव गौतम तेस्रो वरियताको वरिष्ठ नेता रहने कुरामा सहमति भएको हो,’ उपाध्यक्ष तुलाधरले भने । उनका अनुसार वामदेव गौतमपछिको वरियताअनुसार बेदुराम भूसाल त्यसपछि प्रमेश हमाल, घनेन्द्र बस्नेत र त्यसपछि राजेन्द्र पाण्डे रहने छन् । पाण्डे पार्टीका वरिष्ठ उपाध्यक्ष हुन् ।
उनले बाँकी नेताहरूको जिम्मेवारी पार्टी एकता घोषणा कार्यक्रममै सार्वजनिक गरिने बताए । साउन २ गते दुई पार्टीबीच एकता घोषणा कार्यक्रम तय भएको छ ।
एकीकृत समाजवादीका प्रचार विभाग प्रमुख प्रकाश ज्वालाले पनि गौतमलाई तेस्रो वरियताको वरिष्ठ नेताको जिम्मेवारी दिने सहमति भएको बताए । ‘अध्यक्ष र सम्मानीत नेतापछि उहाँको वरियता तोकिएको छ,’ उनले भने । उपाध्यक्ष तुलाधरले गौतम एकीकृत समाजवादी पार्टीमा एकीकृत भएका कारण एकीकरणपछि बन्ने पार्टीको नाम परिवर्तन नहुने पनि बताए । ‘एकीकृत समाजवादीको विचार, एजेन्डा र नीतिमा सहमत भएर आउनुभएको हो । त्यसकारण पार्टीको नाम, एजेन्डा फेर्नुपर्ने भन्ने कुरा छैन,’ उपाध्यक्ष तुलाधरले भने ।
