.gif)
 (1).png){kind=logo}
.png)
लिपुलेकको मुद्दामा ओलीलाई सीको जवाफ : नेपालको दाबीमा हाम्रो कुनै सम्झौता होइन
‘तपाईंहरूको जुन सीमा विवाद हो, त्यसमा हामी पक्ष बन्न चाहँदैनौँ । नेपालको दाबीमा हाम्रो कुनै सम्झौता होइन भन्ने कुरा तपाईंहरुले बुझिदिनुहोला’
.jpg)
काठमाडौं : चीनका राष्ट्रपति सी चिनफिङले लिपुलेकको मुद्दामा नेपालको दाबीमा चीनको कुनै सम्झौता नभएको बताएका छन् ।
चीनको तिन्जियानमा शनिबार प्रधानमन्त्री केपी शर्मा ओलीसँग भएको द्वीपक्षीय वार्तामा लिपुलेकबारे भारत र चीनले हालै गरेको सहमतिबारे नेपालले असहमति जनाएपछि राष्ट्रपति सीले भनेका छन्, ‘नेपालको दाबीमा हाम्रो कुनै सम्झौता होइन भन्ने कुरा तपाईंहरुले बुझिदिनुहोला ।’
भेटवार्तापछि परराष्ट्र मन्त्रालयका सचिव अमृतबहादुर राईले प्रधानमन्त्री ओलीको भनाइ उद्धृत गर्दै ओलीले सन् १८१६ को सुगौली सन्धिअनुसार महाकाली नदीको मुहान पूर्वका सबै भूभाग सार्वभौम मुलुक नेपालको रहेको स्पष्ट पारेको बताए ।
‘नेपाली भूमि लिपुलेकलाई व्यापारिक मार्ग बनाउने विषयमा चीन र भारतबीच भएको सहमतिका विषयमा राष्ट्रपति सीसँग प्रधानमन्त्री ओलीले स्पष्ट रूपमा आपत्ति रहेको कुरा राख्नु भएको छ,’ सचिव राईले प्रधानमन्त्री ओलीको भनाइ उद्धृत गर्दै भने , ‘यस मामिलामा चीनले सहयोग गर्नेछ भन्ने विश्वास नेपालले लिएको छ ।’
जवाफमा राष्ट्रपति सीले नेपालको दाबीमा चीनले कुनै दक्खल नदिने बताएको राईले उल्लेख गरेका छन् । ‘परम्परागतरुपमा यो नाका प्रयोग हुँदै आएको हो तर तपाईंहरूको जुन सीमा विवाद हो, त्यसमा हामी पक्ष बन्न चाहँदैनौँ,’ चिनियाँ राष्ट्रपतिको भनाई उल्लेख गर्दै राईले भने, ‘तपाईंहरुले दुई पक्षले समाधान गर्ने विषय हो। नेपालको दाबीमा हाम्रो कुनै सम्झौता होइन भन्ने कुरा तपाईंहरुले बुझिदिनुहोला भन्ने खालको उहाँको प्रतिउत्तर थियो।’
