.gif)
 (1).png){kind=logo}
.png)
सरकारलाई निर्वाध काम गर्न नदिनेहरू हावी हुनु मुलुकको ठूलो समस्या : राधिका शाक्य
‘राजनीति बुझेकी छु, तर राजनीतिमा आउँदिन’
काठमाडौं । प्रथम महिला राधिका शाक्यले आफूले राजनीति बुझेको तर राजनीतिमा नआउने स्पष्ट गरेकी छन् ।
प्रेस चौतारी नेपालद्वारा आज यहाँ आयोजित ‘करुणा’ पुस्तक ‘लेखिका राधिका शाक्यको सम्पादकसँगको संवाद’ कार्यक्रममा प्रधानमन्त्री केपी शर्मा ओली धर्मपत्नी शाक्यले विद्यार्थीकालदेखि नै राजनीतिमा केही हदसम्म आबद्ध भएको र राजनीतिक व्यक्तित्वसँगको विवाह भएपछि मुलुकको राजनीतिक घटनाक्रमबारे राम्रोसँग बुझ्ने अवसर पाए पनि राजनीति गर्ने पक्षमा आफू नरहेको स्पष्ट पारिन् ।
नेपालमा पछिल्ला दिनमा सकारात्मक सोचका साथ काम गर्नेभन्दा नकारात्मक धारणा बनाइ अनावश्यक कुरा काट्ने पक्ष हावी भएको उल्लेख गर्दै उनले भनिन्, ‘देशलाई माया गर्ने एक सामान्य नेपाली नागरिक भएर बस्न चाहन्छु, अब यो उमेरमा राजनीति गर्न जाने पक्षमा म छैन ।’
प्रथम महिला शाक्यले राजनीतिक अस्थिरताको अफवाह फैलाइ सरकारलाई निर्वाध रूपमा काम गर्न नदिनेहरू हावी हुनु मुलुकको ठूलो समस्या भएको जिकिर गरिन् । उनले दिन–रात नभनि देश र जनताका पक्षमा काम गर्नेहरूलाई धन्यवादसहित प्रशंसा गर्नुको सट्टा गालिगलौज गरी त्यसैमा रमाउने प्रवृत्ति हावी भइरहे देश कहाँ पुग्ला भनी चिन्ता व्यक्त गरिन् ।
एक प्रश्नको जवाफमा शाक्यले देशको प्रधानमन्त्रीसँग भेट्न, सम्पर्क बढाउन र लाभ लिन खोज्नेहरू हाम्रो समाजमा नहोलान् भन्न नसक्ने धारणा राखिन् । ‘शक्तिमा भएका हैसियतले मेरो माइतीतर्फका कुनै पनि नातासम्बन्धका कोही–कसैले राजनीतिक लाभ लिएका भए खोजपड्ताल गरी वास्तविकता सार्वजनिक गरिदिनु हुन आमसञ्चरकर्मीसँग अनुरोध गर्दछु’, उनले भनिन् ।
आफ्नो प्रेरणाको स्रोत श्रीमान् ओली रहेको र उनकै कारण आफूले दुई विषयमा स्नातकोत्तर तहको उपाधि हासिल गर्न सफल भएको उल्लेख गर्दै प्रथम महिला शाक्यले फुर्सद हुनासाथ लेख्न–पढ्न रमाउने र सानैदेखि आफूमा कारुणिक स्वभाव रहेको धारणा राखिन् । श्रीमान् र आफूबीच जीवन र देशलाई हेर्ने दर्शन मिलेकाले पारिवारिक जीवन सहज ढङ्गबाट अघि बढेको उल्लेख गर्दै उनले राति अबेरसम्म अध्ययन–लेखनमा रमाउने प्रधानमन्त्री ओलीको आत्मविश्वासहित स्मरण शक्ति अद्भूत रहेको बताइन् ।
शाक्यले ‘मेरो अनुभूति’ नामक कृति यसअघि नै सार्वजनिक भइसकेको जानकारी दिँदै समयले साथ दिए प्राप्त अनुभव र अनुभूतिलगायत आफूसँग भएका सूचना र सन्दर्भ सामग्रीलाई समेटेर पुस्तकका रूपमा तेस्रो कृति ल्याउने बताइन् । त्यस अवसरमा डा. देवी नेपाल र वरिष्ठ पत्रकार बबिता बस्नेतले भर्खरै सार्वजनिक कृति ‘करुणा’ माथि समीक्षा गर्दै करुणाकी खानी शाक्य र नेकपा ( एमाले) का अध्यक्ष एवं प्रधानमन्त्री ओलीलाई बुझ्न खोज्ने जोकोहीका लागि पुस्तक उपयोगी हुने धारणा राखे । उनीहरुले व्यस्त समयका बाबजुद् प्रथम महिला शाक्यले समयको सदुपयोग गर्दै ‘करुणा’ नामक पठनीय कृति प्रकाशित गरी देश र नेपाली जनतालाई अमूल्य उपहार दिएको बताइन् ।
प्रेस चौतारी नेपालका अध्यक्ष गणेश पाण्डेले संघर्ष, त्याग, समर्पण, शालिनता, सहनशीलता, व्यक्तित्वका हिसाबले ‘प्रथम महिला शाक्य’ उदाहरणीय बन्न सफल भएको उल्लेख गर्दै नेपाली समाजले उनीबाट धेरै कुरा सिक्न सक्नुपर्ने धारणा व्यक्त गरे । उनले प्रथम महिला शाक्यद्वारा लिखित ‘करुणा’ पुस्तक पढी लाभान्वित हुन सबैलाई आग्रह गरे ।
प्रेस चौतारीका महासचिव हीरामान लामाले २०४६ सालको सफल जनआन्दोलनपछि संसदमा सत्ता वा प्रतिपक्ष पार्टीका प्रमुख एवं प्रभावशाली नेताका हैसियतले नेपाली राजनीतिमा सदैव शीर्षस्थानमा रहेका प्रधानमन्त्री केपी शर्मा ओली र राधिका शाक्यको संघर्ष, संवेदना, स.कल्प, अनुभव, संयोग र तथ्यलाई समेटेर कृति आएकाले यसलाई नेपाली समाजले प्रेरणाको स्रोतका रूपमा लिनुपर्ने धारणा व्यक्त गरे । सम्पादकसँगको सो संवाद कार्यक्रममा राजधानी काठमाडौँस्थित मुलधारका सबैजसो आमसञ्चारमाध्यमका सम्पादक एवं वरिष्ठ सञ्चारकर्मीको उपस्थिति थियो ।
