.gif)
 (1).png){kind=logo}
.png)
एमालेको प्रमुख सचेतकमा महेश बर्तौला र सचेतकमा सुनिता बराल नियुक्त
काठमाडौं । नेकपा (एमाले) ले संसदीय दलको प्रमुख सचेतकमा महेश बर्तौलालाई नियुक्त गरेको छ । आज (मंगलबार) पार्टी अध्यक्ष केपी शर्मा ओलीले बर्तौलालाई प्रमुख सचेतक नियुक्त गरेका हुन् । यसअघिका प्रमुख सचेतक पदम गिरी मन्त्री नियुक्त भएपछि बर्तौलालाई नियुक्त गरिएको हो । यस्तै, सचेतकमा सुनिता बराललाई नियुक्त गरिएको छ ।
यसअघि २०७९ पुसमा ४२ दिन स्वास्थ्य मन्त्री बनेर बाहिरिएपछि गिरीलाई एमाले संसदीय दलका नेता केपी शर्मा ओलीले प्रमुख सचेतकमा नियुक्त गरेका थिए । तर अहिले वाम गठबन्धन ब्युँतिदा गिरी मन्त्रीमा दोहोरिएका छन् । गिरीको स्थान बर्तौलालाई लिँदा एमाले सचेतकमा समानुपातिक सांसद सुनिता बरालले अवसर पाएकी छन् ।
एमाले अध्यक्ष केपी शर्मा ओली निकट उनी समानुपातिक प्रणालीबाट सांसद भएकी थिइन् । सुनिता अनेरास्ववियुको अध्यक्ष हुँदा बर्तौला उपाध्यक्ष थिए । प्रतिनिधिसभाको प्रमुख सचेतक बनाएका बर्तौला एमालेका बौद्धिक युवा नेताका रुपमा चिनिन्छन् । उनले २०७९ को चुनावमा मकवानपुर क्षेत्र नम्बर २ मा आफ्नै गुरु एवम् नेकपा एकीकृत समाजवादीका नेता विरोध खतिवडालाई पराजित गरेका थिए ।
