.gif)
 (1).png){kind=logo}
.png)
सुदूरपश्चिमले जनकपुरलाई दियो १२१ रनको लक्ष्य
काठमाडौं : नेपाल प्रिमियर लिग (एनपीएल) मा सुदूरपश्चिम रोयल्सले पहिलो संस्करणको विजेता जनकपुर बोल्ट्सलाई १२१ रनको लक्ष्य दिएको छ ।
जनकपुरका बलरले उत्कृष्ट प्रदर्शन गरेपछि त्रिवि क्रिकेट मैदानमा टस जितेर पहिले ब्याटिङ गरेको सुदूरपश्चिमले निर्धारित २० ओभरमा ९ विकेट गुमाएर १२० रन बनाएको हो ।
सुदूरपश्चिमका लागि ब्रान्डन म्याकमुलेनले सर्वाधिक ३३ रन बनाए । उनले २३ बलमा २ चौका र २ छक्का प्रहार गरे । थरिन्दु रत्नायके २८ बलमा १ चौका र २ छक्कासहित २७ रनमा अविजित रहे ।
आरिफ शेखले ११ तथा ओपनरद्वय सैफ अली जैब र विनोद भण्डारीले समान १० रन बनाए ।
जैब र भण्डारीले पहिलो विकेटका लागि २२ रनको साझेदारी गरेका थिए । यही नै सुदूरपश्चिमको इनिङ्समा सबैभन्दा ठूलो साझेदारी बन्यो । त्यसपछि भने टोलीले गतिलो साझेदारी गर्न सकेन । नियमित अन्तरालमा विकेट गुमाउँदा सुदूरपश्चिम ठूलो योगफल बनाउन असफल भयो ।
टसका क्रममा सुदूरपश्चिमका कप्तानले १७० रन बनाउने लक्ष्य सुनाएका थिए । तर, जनकपुरका बलरले सुरुदेखि नै दबाब कायम राखेपछि टोली १२० रनमै सीमित भयो ।
जनकपुरका लागि कप्तान हर्मीत सिंहले सर्वाधिक ४ विकेट लिए । उनले ४ ओभरमा १७ रन खर्चिए । ह्यारी टेक्टर, राहुल यादव, आदित्य महता र अभिषेक तिवारीले समान १ विकेट लिए ।
यसै खेलबाट एनपीएलमा डेब्यु गरेका आयरल्यान्डका खेलाडी टेक्टरले किफायती बलिङ गरे । उनले ४ ओभरमा जम्मा ९ रन खर्चिएर १ विकेट लिए ।
2026-09-06-13-00-27.jpg)
2026-11-10-16-50-21.jpg)
