.gif)
 (1).png){kind=logo}
.png)
आईजीपी कार्कीलाई हटाउन पार्टीबाटै निर्देशन आएको थियो : मन्त्री पोखरेल
काठमाडौं : नेपाल प्रहरीका महानिरीक्षक (आईजीपी) दानबहादुर कार्कीको जिम्मेवारी हेरफेर गर्न राष्ट्रिय स्वतन्त्र पार्टी (रास्वपा) बाटै निर्देशन आएको सरकारले खुलासा गरेको छ ।
सरकारका प्रवक्ता एवं शिक्षा तथा खेलकुदमन्त्री सस्मित पोखरेलले बदलिँदो परिस्थितिमा आईजीपी कार्कीको जिम्मेवारी परिवर्तन गर्न पार्टीबाट निर्देशन आएको बताएका हुन् ।
मन्त्रिपरिषद् बैठकपछि सञ्चारकर्मीसँग कुरा गर्दै मन्त्री पोखरेलले संवेदनशील विषयमा सरकारले निर्णय लिनुपर्ने भन्दै पार्टीबाट निर्देशन आएको खुलाएका हुन् ।
‘धेरै ठाउँबाट अहिले बदलिँदो परिस्थिति छ । संवेदनशील विषयमा सरकारले केही गर्नुपर्यो भन्ने पार्टीबाट निर्देशन आएको थियो,’ उनले भने ।
उनले कार्कीलाई पदबाट हटाउनु कारबाही नभई जिम्मेवारी परिवर्तन मात्रै भएको दाबी गरे । प्रधानमन्त्रीलाई सुरक्षा सम्बन्धी सल्लाह र सुझाव दिने जिम्मेवारी पनि उत्तिकै संवेदनशील रहेको उनको भनाइ थियो ।
‘उहाँलाई कारबाही गरिएको होइन, उहाँको जिम्मेवारी फेरबदल भएको हो । उहाँलाई सुरक्षा सल्लाहकार पदमा प्रधानमन्त्री कार्यालयमा ल्याइएको हो । कारबाही भएकै छैन । अब उहाँको भूमिका प्रधानमन्त्रीलाई सल्लाह सुझाव दिने हो,’ पोखरेलले भने ।
यसअघि मन्त्रिपरिषद् बैठकले कार्कीलाई प्रधानमन्त्रीको विशेष सुरक्षा सल्लाहकारमा नियुक्त गर्ने र एआईजी डा. मनोज केसीलाई नयाँ प्रहरी महानिरीक्षक बनाउने निर्णय गरेको थियो ।
