रूपन्देही–३ उपनिर्वाचन : रास्वपाबाट डा. लेखजंग थापा बने उम्मेदवार 

---

नयाँ पेज

२०८२ भदौ १५ आइतबार २०:०७ बजे

काठमाडौं ।  राष्ट्रिय स्वतन्त्र पार्टी (रास्वपा) ले रुपन्देही–३ को उपनिर्वाचनका लागि डा. लेखजंग थापालाई उम्मेदवार बनाएको छ । पार्टी सचिवालय बैठकले नौं जना आकांक्षीमध्ये थापालाई उम्मेदवार घोषणा गरेको हो ।

३५ दिने लामो छनोट प्रक्रियापछि आज (आइतबार) उम्मेदवार टुंगो लागेको छ । रास्वपाले आकांक्षी उम्मेदवारको सूचीमा रहेका न्युरोलोजिष्ट डा. लेखजंग थापालाई आधिकारिक उम्मेदवारको रूपमा घोषणा गरेको छ ।

आइतबार सचिवालय बैठकले थापालाई आधिकारिक उम्मेदवारको रूपमा घोषणा गरेको हो । सिद्धार्थनगर–९, अञ्चलपुरमा जन्मिएका डा. थापा वरिष्ठ न्युरोलोजिष्ट र सामाजिक अभियन्ता हुन् । उनले नेपाली न्युरो साइन्सको विकास र बिरामी उपचारमा १६ वर्षभन्दा लामो समय बिताएका छन् ।

पोखराको मणिपाल कलेज अफ मेडिकल साइन्सेजबाट एमबीबीएस, बीपी कोइराला स्वास्थ्य विज्ञान प्रतिष्ठानबाट इन्टरनल मेडिसिनमा एमडी र कलेज अफ मेडिकल साइन्सेज चितवनबाट डीएम न्युरोलोजी अध्ययन गरेका डा. थापा अमेरिकाको प्रसिद्ध हार्वर्ड विश्वविद्यालयको ‘सेफ्टी क्वालिटी लिडरसिप एन्ड इन्फमेटिभ’ का ग्राजुएट्स हुन् ।

अनुसन्धानकर्मी समेत रहेका उनका ८० बढी अनुसन्धानात्मक पेपरहरू राष्ट्रिय तथा अन्तर्राष्ट्रिय जर्नलहरूमा प्रकाशित छन् । नेपाल स्ट्रोक एशोसिएसनका संस्थापक अध्यक्ष समेत रहेका डा. थापाले स्ट्रोकको उपचार, निदान र सचेतनामा भूमिका खेलेका छन् । उनकै टिमको पहलमा बनाइएको राष्ट्रिय स्ट्रोक उपचार व्यवस्थापन प्रोटोकल समेत जारी भएको छ । जसलाई स्वास्थ्य तथा जनसंख्या मन्त्रालयले समेत स्वीकृत गरेको छ ।

डा. थापाले आफ्नै पहलमा नेपालका हजारौं चिकित्सक, नर्स र स्वास्थ्यकर्मीहरूलाई ‘स्ट्रोक मास्टर क्लास’ मार्फत स्ट्रोकको पहिचान, उपचार र सचेतनासम्बन्धी तालिम दिँदै आएका छन् ।

उनी डेढ दशकयता हप्ताको दुई दिन काठमाडौंबाट जन्मभूमि भैरहवा पुगेर बिरामीको सेवा गर्दै आएका छन् । मुलुकलाई सुशासनसहितको सामाजिक न्याय, विकास र समृद्धिको बाटोमा लैजाने अठोटका साथ उनी राजनीतिमा होमिएका हुन् । रुपन्देही–३ मा कात्तिक १७ गते उपनिर्वाचन हुँदैछ ।

आज आयोजित्र पत्रकार सम्मेलनमा पार्टीका कार्यवाहक सभापति डीपी अर्यालले उम्म्दवार घोषणा गरे । उनले उम्मेदवार घोषणासँगै थापालाई घण्टी उपहार दिएका थिए ।

रास्वपाको उम्मेदवारी घोषणामा अन्य पार्टीको भन्दा केहि फरक दृष्य देखिएको छ । पत्रकार सम्मेलनमा ९ जना नै आकांक्षीहरु उपस्थित थिए । अन्य पार्टीहरुमा एक जना उम्मेदवार घोषणा भएपछि अन्य आकांक्षीहरु असन्तुष्ट बन्ने, निजलाई असहयोग गर्ने परिपाटी छ । तर, रास्वपाका ९ जना आकांक्षीहरु नै आधिकारिक उम्मेदावरको समर्थनमा खडा भएका छन् ।

त्यसो त पार्टीले पहिल्यै जो उम्मेदवार घोषणा भए पनि सबैले साथ र सहयोग गर्ने प्रतिवद्धतापत्रमा हस्ताक्षर गराएको थियो । थापाको नाम घोषणा भएपछि अन्य ८ जनाले उनलाई बधाइ दिए । थापाले पनि सबैसँग पालैपालो अंकमाल गरेर सहृदयता प्रकट गरेका थिए ।