.gif)
 (1).png){kind=logo}
.png)
प्रधानमन्त्री ओलीको प्रश्न : कसले अविश्वास गर्यो र विश्वासको मत चाहियो ?
काठमाडौं । प्रधानमन्त्री केपी शर्मा ओलीले सरकारमा सहभागी नागरिक उन्मुक्ति पार्टीले विश्वासको मत फिर्ता लिएपछि विश्वासको मत लिनेबारे प्रतिक्रिया दिएका छन् । प्रतिनिधिसभा बैठकबाट आज (सोमबार) बाहिरिँने क्रममा प्रधानमन्त्री ओलीले कसैले अविश्वास नगरेकाले विश्वासको मत लिन नहुने बताए । विश्वासको मत कहिले लिने तयारी छ भनी पत्रकारले गरेको प्रश्नमा प्रधानमन्त्री ओलीले प्रतिप्रश्न गरे, ‘कसले अविश्वास गरेको छ र विश्वासको मत चाहियो ?’
नागरिक उन्मुक्ति पार्टीले विश्वासको मत फिर्ता लिएको छ नि भन्ने प्रश्नको जवाफमा ओलीले भने, ‘कहिले ?’ नागरिक उन्मुक्ति पार्टी विपक्षीको बेन्चमा बसेको छ नि ? भन्ने प्रश्नमा ओलीको जवाफ थियो, ‘मैले हेरिनँ नि !’ सरकारमा सहभागी दलले विश्वासको मत फिर्ता लिएपछि प्रधानमन्त्रीले संसदमा विश्वासको मत लिनुपर्ने संवैधानिक व्यवस्था रहेको छ । संविधानको धारा १०० (२) मा ‘सरकारको नेतृत्व गरेको राजनीतिक दल विभाजित भए वा सरकारमा सहभागी दलले समर्थन फिर्ता लिए ३० दिनभित्र विश्वासको मत लिनुपर्ने’ प्रावधान छ । नागरिक उन्मुक्ति पार्टीले आइतबार नै सरकारलाई दिएको विश्वासको मत फिर्ता लिएको भनी सभामुख देवराज घिमिरेलाई पत्र बुझाएको थियो । सोमबारको बैठकदेखि उक्त पार्टी विपक्षीको बेन्चमा बसिसकेको छ ।
