.gif)
 (1).png){kind=logo}
.png)
कर्णाली सरकारप्रति कांग्रेस असन्तुष्ट, संसदबाटै सरकार छाड्ने चेतावनी
सुर्खेत । नेपाली कांग्रेस कर्णाली प्रदेश संसदीय दलका नेता जीवनबहादुर शाहीले संसदबाटै सरकार छाड्ने चेतावनी दिएका छन् । आज (सोमबार) देखि सुरु भएको प्रदेश सभा बैठकलाई सम्बोधन गर्दै नेता शाहीले भौतिक पूर्वाधार तथा सहरी विकासमन्त्री शेरबहादुर बुढालाई बर्खास्त नगरे सरकारबाट बाहिरिने चेतावनी दिए । कर्णाली प्रदेशसभाको दोस्रो कार्यकालको पाँचौं अधिवेशनको पहिलो बैठकमा बोल्दै शाहीले मन्त्री बुढाको कार्यशैलीप्रति प्रश्न उठाउँदै तत्काल मन्त्रीका बारेमा आवश्यक निर्णय नदिए सरकार छाड्ने चेतावनी दिए ।
‘यो सरकार निरन्तर हुने हो भने भौतिक पूर्वाधारमन्त्रीको स्थिति के हुने हो ? एउटा दलको नेताको फोन नउठाउने ? के गर्छ भन्ने ? त्यो मन्त्रीलाई बर्खास्त नगर्दासम्म हामी सरकारमा बस्ने कि नबस्ने मुख्यमन्त्री ज्यू ?’ प्रदेश सभामा शाहीले प्रश्न गरे । उनले प्रमुख सत्ता साझेदार र संसदको ठूलो दलको नेतालाई अपमान गरिएको भन्दै गठबन्धनबारे पुनर्विचार गर्नुपर्ने चेतावनी दिए । प्रदेश सभालाई ४० मिनेट सम्बोधन गरेका शाहीले मुख्यमन्त्री यामलाल कँडेल र सरकारप्रति चर्को आक्रोश पोखेका छन् ।
पहिले कांग्रेस–माओवादीको गठबन्धनको सरकार अपवित्र भन्ने मुख्यमन्त्री अहिले कांग्रेससँग एमाले मिलेर सरकार सञ्चालन गर्दा पवित्र भयो त ? भन्दै मुख्यमन्त्री कँडेललाई समेत प्रश्न गरे । ‘म यहाँ भएको भए गठबन्धन के हुन्थ्यो थाहा छैन,’ उनले भने, ‘हामी सबै दास भयौं, दलका नेताका दास भयौं, संघीयता यसरी कसरी कार्यान्वयन हुन्छ ? हामीले हाम्रो निर्णय गर्न नपाउने सबै माथिकै नेताले निर्णय गर्दिनुपर्ने हामीले मान्दिनु पर्ने ?’
कांग्रेस प्रदेश सरकारमा गएको फाइदा भएन भन्ने गुनासो मात्रै सुन्नुपरेको भन्दै उनले सरकार र सांसदले कानुनसम्मत कुरालाई समेत अड्काएको टिप्पणी गरे । ‘सरकार अविच्छिन्न उत्तराधिकारी संस्था हो, तर यहाँ नेतृत्वपिच्छे योजना काट्ने काम भएको छ,’ उनले भने ।
शाहीले सभामुखको भूमिकामाथि समेत प्रश्न उठाएका छन् । ‘प्रदेश सभा कसको छायाँमा परेको हो ? सभामुख र सचिव ? सभामुख र उपसभामुखबीच बोलचाल छैन, सचिव उपसचिवबीच बोलचाल छैन ? यस्तो तरिकाले संसद् चल्छ ?’ भन्दै उनले प्रश्न समेत गरे । उनले पहिले सम्झौता गरेको ८ बुँदे सहमति कार्यान्वयन गर्नुपर्ने बताए ।
‘म त कारबाही भोग्न तयार छु, हटाउला, हैन भनेपछि अख्तियारमा हाल्लान् ? कठै बिचरा ! मेरो प्रमुख सचेतकले यहाँबाट अख्तियारका विषयमा बोल्दा किन बोलेको ? कारबाहीमा परिएला रे ? अब उपरान्त यस्तो कुरा भयो भने राम्रो हुँदैन’ उनले भने । लगत्तै बोलेका शाहीले वाइडबडी काण्डमा आफू मुछिएका विषयमा स्पष्ट पारे । ‘यो काण्डमा मलाई जेल नै गइदियोस् भनेर प्रदेश परिसरमा निकै बदनामसम्म गराए,’ उनले भने ।
