भारतीय खेलाडी केपी अनुश्री र सूर्या एसले चितवन शक्तिबाट एभरेष्ट महिला भलिबल लिग खेल्ने 

---

नयाँ पेज

२०८१ भदौ २६ बुधबार १८:२० बजे

काठमाडौं । भारतीय राष्ट्रिय टिमकी खेलाडी केपी अनुश्रीले चितवन शक्तिबाट एभरेष्ट महिला भलिबल लिग खेल्ने भएकी छिन् ।  चितवन शक्तिले तेस्रो विदेशी खेलाडीका रूपमा भारतीय खेलाडी अनुश्रीलाई टिममा अनुबन्ध गरेको हो ।

यसअघि चितवनले भारतीय खेलाडी सूर्या एसलाई पनि लिगका लागि अनुबन्ध गरेको थियो । केपी अनुश्री भारतकी युवा स्टार खेलाडी हुन् । अनुश्रीलाई चितवनले आउटसाइड हिटरका रूपमा टिममा भित्र्याएको जनाएको छ । अनुश्रीले यसअघि एनभीएल क्लब च्याम्पियनसिप र एनभीएल लिगमा बुटबलको एभरेस्ट क्लबबाट खेलेकी थिइन् ।

अनुश्री च्याम्पियनसिपमा उत्कृष्ट खेलाडी र एनभीएल लिगमा उत्कृष्ट स्पाइकर घोषित भएकी थिइन् । चितवन शक्तिले यसअघि अजरबैजानकी आउटसाइड हिटर केन्सिया पावेल्निकोलाई अनुबन्ध गरेको थियो । चितवनकी मार्की खेलाडी नेपाली महिला राष्ट्रिय टिमकी कप्तान अरुणा शाही हुन् ।