.gif)
 (1).png){kind=logo}
.png)
एमालेले चुनाव मात्र होइन, महासंग्राम जित्यो : ओली
काठमाडौँ । प्रमुख प्रतिपक्षी दल नेकपा एमालेका अध्यक्ष केपी शर्मा ओलीले स्थानीय तह चुनावमा एमालेले चुनाव मात्र नभई महासंग्राम नै लडेर जितेर आएको बताएका छन् ।
एमालेबाट निर्वाचित जनप्रतिनिधिका लागि काठमाडौंमा भएको प्रशिक्षण कार्यक्रममा ओलीले महासंग्राम जितेर आएको भन्दै जनप्रतिनिधिलाई बधाई दिए । उनले चुनावका नाममा गरिएका अस्वस्थ र अलोकतान्त्रिक गतिविधिसँग पनि लडेर आएका कारण एमालेका जनप्रतिनिधिले महासंग्राम लडेको बताए । ओलीले एमाले बाहेक अरु पार्टीसँग विकासको कुनै योजना नरहेको आरोप दावी गरे ।
अध्यक्ष ओलीले पार्टीका निर्वाचित जनप्रतिनिधिलाई पाँच वर्षमा सक्षम बन्ने गरी काम गर्न निर्देशन दिएका छन् । बिहीबार राष्ट्रिय सभागृहमा आयोजित नव निर्वाचित जनप्रतिनिधिलाई प्रशिक्षण कार्यक्रममा उनले कार्यकाल पूरा गर्दा आफ्नो नाम हाईहाई हुने गरी काम गर्न शुभकामना पनि दिए ।
‘तपाईंहरूले पाँच वर्षको कार्यकाल पूरा गर्दा तपाईंहरूको नाम हाईहाई होस् । आलोचना सुन्न नपरोस् । प्रशंसा होस् । स्थानीय तहमा कसरी काम गर्नुपर्छ भनेर नमुना हुनुस्’ उनले भने, ‘जनताले प्राप्त गर्नुपर्ने सेवा सुविधा उपलब्ध गराउनुस् । जनताको सेवामा सधैँ तत्पर रहन सक्नुस् ।’ उनले पालिकामा देखिने गरी विकासका काम गर्न आफ्ना जनप्रतिनिधिहरुलाई निर्देशन दिए ।
