सामाजिक सद्भाव खल्बल्याउने अवाञ्छित गतिविधिमा संलग्न नहुन ९ दलको अपिल

---

नयाँ पेज

२०८३ श्रावण १३ बुधबार १३:०६ बजे

काठमाडौं :  सुनसरी घटनाबारे राजनीतिक दलहरूले संयुक्त अपिल जारी गरेका छन्। राष्ट्रिय स्वतन्त्र पार्टी (रास्वपा) सभापति रवि लामिछानेको आह्वानमा बुधबार सिंहदरबारमा बसेको सर्वदलीय बैठकले सात बुँदे संयुक्त अपिल जारी गरेको हो।

अपिलमा रास्वपा सभापति रवि लामिछाने, नेपाली कांग्रेस सभापति गगन थापा, नेपाली कम्युनिस्ट पार्टी (नेकपा) संयोजक पुष्पकमल दाहाल ‘प्रचण्ड’, नेकपा एमाले महासचिव शंकर पोखरेल, राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङ्देन, जनमत पार्टी अध्यक्ष सीके राउत, लोकतान्त्रिक समाजवादी पार्टी (लोसपा) अध्यक्ष महन्थ ठाकुर, श्रम संस्कृति पार्टीका महासचिव आरेन राई र जनता समाजवादी पार्टी (जसपा) नेपालका नेता प्रकाश अधिकारीले हस्ताक्षर गरेका छन्।

संयुक्त अपिलमार्फत दलहरूले सदियौंदेखि कायम रहेको सामाजिक सद्भाव र पारस्परिक भाइचारालाई खल्बल्याउने कुनै पनि गतिविधि तथा उत्तेजनामा नआउन आम नागरिकलाई आग्रह गरेका छन्।

‘आवेग र मुठभेडले समस्याको समाधान गर्दैन, बरु थप जटिलता निम्त्याउँछ,’ अपिलमा भनिएको छ। दलहरूले लोकतन्त्रमा देखिएका जटिल असन्तुष्टि र समस्याहरूको समाधान शान्तिपूर्ण संवाद र सहमतिमार्फत मात्र सम्भव हुने भन्दै सम्बन्धित सबै पक्षलाई आफ्ना माग र असन्तुष्टि शान्तिपूर्ण रूपमा राख्न आग्रह गरेका छन्।

उनीहरूले सरकारलाई पनि अधिकतम संयमता अपनाउँदै परिस्थितिलाई सामान्यीकरण गर्न, घटनाको निष्पक्ष छानबिन गरी दोषीमाथि कानुनअनुसार कारबाही गर्न र पीडितलाई उचित राहत उपलब्ध गराउन ध्यानाकर्षण गराएका छन्।

अपिलमा स्थानीय तहदेखि केन्द्रसम्म सर्वदलीय तथा सर्वपक्षीय संवाद अघि बढाउन, सामाजिक सञ्जालमार्फत फैलिन सक्ने भ्रम र अफवाह नियन्त्रण गर्न तथा सञ्चारमाध्यमलाई तथ्यपरक सूचना सम्प्रेषण गर्न आग्रह गरिएको छ। दलहरूले भविष्यमा यस्ता संवेदनशील घटना दोहोरिन नदिन केन्द्रीय तहबाट समन्वय र नेतृत्वदायी भूमिका निर्वाह गर्ने प्रतिबद्धता पनि जनाएका छन्।

अपिल :

राष्ट्रिय स्वतन्त्र पार्टी (रास्वपा) का सभापति माननीय रवि लामिछानेज्यूको आह्वानमा आज मिति २०८३ श्रावण १३ गते सम्पन्न सर्वदलीय बैठकले सुनसरी लगायत विभिन्न जिल्लाहरूमा हालै विकसित अत्यन्तै संवेदनशील, दुःखद घटनाक्रम र त्यसले उत्पन्न गरेको असहज परिस्थितिको गम्भीर समीक्ष गर्दै निम्न बमोजिमको संयुक्त वक्तव्य तथा अपिल जारी गरेको छ:

१. समवेदना तथा सहानुभूति:

पछिल्ला घटनाक्रमहरूमा परी ज्यान गुमाउने मृतक प्रति गहिरो दुःख व्यक्त गर्दै हार्दिक श्रद्धाञ्जली अर्पण गर्दछौं र शोकाकुल परिवारजनमा गहिरो समवेदना प्रकट गर्दछौं। साथै घटनामा परी घाइते हुनुभएका सम्पूर्ण नागरिक तथा सुरक्षाकर्मीहरूको शीघ्र स्वास्थ्य लाभको कामना गर्दछौं।

२. सामाजिक सद्भाव र शान्तिको अपिल:

नेपालको पहिचान नै विविधताबीचको एकता, सहिष्णुता र सहअस्तित्व हो। सदियौं देखि हाम्रो समाजमा कायम रहेको पारस्पारिक भाइचारा र सामाजिक सद्भावलाई खल्बल्याउने कुनै पनि प्रकारका अवाञ्छित गतिविधि र उत्तेजनामा नआउन हामी सम्पूर्ण देशवासी आम नागरिकहरूमा हार्दिक अपिल गर्दछौं। आवेग र मुठभेडले समस्याको समाधान नभई थप जटिलता मात्र निम्त्याउने यथार्थप्रति ह सबै सचेत हुनु जरुरी छ।

३. शान्तिपूर्ण संवाद र सहमतिको आह्वान:

लोकतन्त्रमा जस्तो सुकै जटिल असन्तुष्टि र समस्याहरूको समाधान पनि शान्तिपूर्ण संवाद र सहमतिका माध्यमबाट मात्र सम्भव छ। आफ्ना माग र असन्तुष्टिहरू शान्तिपूर्ण रूपमा राख्न सम्बन्धित सबै पक्षलाई हामी आह्वान गर्दछौं।

४. तल्लो तहमा सर्वदलीय संयन्त्र र बैठकको आह्वान :

समाजमा शान्ति र सद्भाव कायम राख्न केन्द्रको मात्र प्रयास पर्याप्त हुँदैन। तसर्थ, प्रदेश, जिल्ला र स्थानीय तहमा तत्काल सर्वदलीय तथा सर्वपक्षीय बैठकहरू आयोजना गर्न, संवादलाई तल्लो तहसम्म पुऱ्याउन र नागरिकस्तरमा विश्वासको वातावरण निर्माण गर्न हामी आ-आफ्ना पार्टीका विभिन्न तहका समितिहरूलाई निर्देशित गर्दछौं। स्थानीय स्तरमा धार्मिक अगुवा, नागरिक समाज र स्थानीय प्रशासनलाई जोडेर शान्ति कायम राख्न सक्रिय हुनु आजको आवश्यकता हो।

५. केन्द्रीय तहबाट समन्वय र नेतृत्वदायी भूमिका:

यस्ता प्रकृतिका दुःखद र संवेदनशील घटनाहरू भविष्यमा देशका कुनै पनि भू-भागमा दोहोरिन नदिन हामी, राजनीतिक दलको केन्द्रीय तह, अत्यन्तै गम्भीर छौं। यसका लागि आवश्यक पहलकदमी, निरन्तर समन्वय र अनुगमन गर्दै नेतृत्वदायी भूमिका निर्वाह गर्न हामी प्रतिबद्ध छौं।

१ ६. अफवाह नियन्त्रण र सामाजिक सञ्जालको जिम्मेवार प्रयोग:

यस्तो संवेदनशील समयमा सामाजिक सञ्जाल लगायतका माध्यमबाट फैलाइन सक्ने भ्रामक समाचार, घृणास्पद अभिव्यक्ति र अफवाहहरूले स्थितिलाई थप भयावह बनाउन सक्छन्। तसर्थ, सामाजिक सञ्जालको अत्यन्त जिम्मेवार प्रयोग गर्न आम नागरिकलाई अनुरोध गर्दै, सञ्चारमाध्यमहरूलाई समेत संयमित र तथ्यपरक सूचना मात्र सम्प्रेषण गरिदिन आग्रह गर्दछौं।

७. नेपाल सरकारको ध्यानाकर्षणः

नागरिकको जिउ धनको रक्षा गर्नु राज्यको प्राथमिक दायित्व हो। अधिकतम संयमता अपनाउँदै परिस्थितिलाई सामान्यीकरण गर्न, घटनाहरूको निष्पक्ष छानबिन गरी दोषीउपर कानुन बमोजिम कारबाही गर्न र पीडित पक्षलाई उचित क्षतिपूर्ति तथा राहत उपलब्ध गराउन हामी नेपाल सरकारको गम्भीर ध्यानाकर्षण गराउँछौं।

अन्तमा, राष्ट्रिय एकता र सामाजिक सद्भावको रक्षाका लागि हामी उपस्थित सम्पूर्ण राजनीतिक दलहरू एकताबद्ध रहेको सन्देश प्रवाह गर्दै, उत्पन्न समस्याको दिगो, प्रभावकारी एवं शान्तिपूर्ण समाधानका लागि सरकार र समाजलाई हर सम्भव सहयोग गर्न हामी दृढ संकल्पित छौं।

रवि लामिछाने (सभापति, रास्वपा)

गगन थापा (सभापति, नेपाली कांग्रेस)

पुष्पकमल दाहाल (अध्यक्ष, नेपाली कम्युनिष्ट पार्टी) प्रचण्ड

शंकर पोखरेल (महाससचिव, नेकपा एमाले)

आरेन राई (महासचिव, श्रम संस्कृति पार्टी)

महन्थ ठाकुर (अध्यक्ष, लो.स.पा.) म

राजेन्द्र लिङ्देन (अध्यक्ष, राप्रपा )

सीके राउत (अध्यक्ष, जनमत पार्टी)

प्रकाश अधिकारी (नेता, जसपा नेपाल)