इराकको मरुभूमिमा इजरायली ‘गोप्य सैन्य अखडा’

---

नयाँ पेज

२०८३ बैशाख २८ सोमबार ०८:२९ बजे

काठमाडौं : इरानविरुद्धको आफ्नो सैन्य हवाई अभियानलाई थप प्रभावकारी बनाउन इजरायलले इराकको मरुभूमिमा एउटा गोप्य सैन्य अखडा स्थापना गरेको खुलासा भएको छ।

अमेरिकी समाचार संस्था 'वाल स्ट्रिट जर्नल' को रिपोर्टलाई उद्धृत गर्दै रोयटर्सले जनाएअनुसार, उक्त अखडाको पहिचान गोप्य राख्न इजरायली सेनाले नजिकै पुगेका इराकी सैनिकहरूमाथि हवाई हमला समेत गरेको थियो। यो गोप्य सैन्य संरचना इरानविरुद्धको अमेरिका–इजरायल तनावपूर्ण अवस्था सुरु हुनुभन्दा ठीकअघि अमेरिकाको पूर्ण जानकारीमा निर्माण गरिएको दाबी गरिएको छ।

यस अखडालाई इजरायली वायुसेनाको महत्वपूर्ण सामग्री व्यवस्थापन केन्द्र (लजिस्टिक हब) को रूपमा प्रयोग गरिँदै आएको छ। जहाँ विशेष सुरक्षा बल तैनाथ गर्नुका साथै युद्धका क्रममा खसालिएका इजरायली पाइलटहरूको तत्काल उद्धारका लागि 'खोज तथा उद्धार टोली' समेत तयारी अवस्थामा राखिएको बताइएको छ।

मार्च महिनाको सुरुआतमा स्थानीय गोठालाहरूले सो क्षेत्रमा हेलिकोप्टरको अस्वाभाविक आउजाउ र सैन्य गतिविधि देखेपछि यो रहस्य बाहिर आएको हो। सोही सूचनाका आधारमा अनुसन्धानका लागि खटिएका इराकी सैनिकहरूमाथि इजरायली सेनाले बल प्रयोग गरी उनीहरूलाई सो स्थानबाट टाढै राख्ने प्रयास गरेको रिपोर्टमा उल्लेख छ।

यसै घटनालाई लिएर इराकले मार्चको अन्त्यतिर संयुक्त राष्ट्रसंघमा उजुरी दर्ता गर्दै आफ्नो भूमिमा भएको विदेशी आक्रमणको दोष अमेरिकामाथि लगाएको थियो। यद्यपि, वाल स्ट्रिट जर्नलले आफ्ना स्रोतहरूलाई उद्धृत गर्दै उक्त हवाई हमलामा अमेरिकाको कुनै संलग्नता नरहेको स्पष्ट पारेको छ।

हालसम्म इजरायली प्रधानमन्त्रीको कार्यालयले यसबारे कुनै आधिकारिक धारणा सार्वजनिक गरेको छैन भने रोयटर्सले पनि यस रिपोर्टको स्वतन्त्र पुष्टि हुन बाँकी रहेको जनाएको छ।