.gif)
 (1).png){kind=logo}
.png)
दल फेरेका र भ्रष्टाचार आरोप लागेका दुई पूर्व पालिका अध्यक्ष एमालेमा प्रवेश
.jpg)
बुटवल । रुपन्देहीका दुई वटा गाउँपालिकाका पूर्व अध्यक्ष सत्तारुढ नेकपा एमालेमा प्रवेश गरेका छन् । सम्मरीमाई गाउँपालिका पूर्व अध्यक्ष जितेन्द्रनाथ शुक्ला (बब्लु) र मर्चवारी गाउँपालिकाका पूर्व अध्यक्ष केशवनन्द बानियाँ शनिबार एमाले प्रवेश गरेका हुन् । साथै उनीहरूका समर्थक पनि एमालेमा प्रवेश गरेका छन् ।
उनीहरूलाई शनिबार एमाले उपाध्यक्ष तथा अर्थमन्त्री विष्णु पौडेलले पार्टीमा स्वागत गरेका छन् । सम्मरीमाई ६ असुरैना निवासी शुक्ला, गच्छदार नेतृत्वको मधेशी जनअधिकार फोरमबाट २०७४ मा पालिका अध्यक्ष निर्वाचित भएका थिए ।
त्यसपछि कांग्रेस अनि एमाले हुँदै २०७९ मा माओवादीमा प्रवेश गरेर स्थानीय तहमा उम्मेदवार बनेर पराजित भएका थिए । एमाले प्रवेश गरेका बानियाँले २०७४ सालमा उपेन्द्र यादव समूहको मधेशी जनअधिकार फोरमबाट मर्चवारी गाउँपालिकाको अध्यक्ष जितेका थिए । २०७९ सालमा लोसपाबाट गाउँपालिका अध्यक्षमै पुनः उम्मेदवार बनेका उनी त्यतिबेला भने पराजित भए ।
पराजित भएपछि उनी जनता समाजवादी पार्टी नेपाल हुँदै जनमत पार्टीमा प्रवेश गरेका थिए । गत आम चुनावमा उनी प्रदेश सभाको उम्मेदवार बनेर पराजित भएका थिए । बानियाँविरुद्ध २०७९ चैतमा गैरकानुनी सम्पत्ति आर्जन गरी भ्रष्टाचार गरेको अभियोगमा अख्तियारले विशेष अदालतमा मुद्दा दायर गरेको थियो ।
स्रोत नखुलेको सम्पत्ति बराबर बानियाँलाई ९१ लाख ८६ हजार ५४३ रूपैयाँ ३० पैसा बिगो जफत र जरिवाना असुल गर्न मागदाबीसहित मुद्दा दर्ता भएको थियो ।
बानियाँको खर्च तथा लगानीतर्फ छोराहरूलाई अध्ययन खर्च, घर निर्माण खर्च, छोराको नाममा विभिन्न जग्गा खरिद, बिमा बापत बुझाएको प्रिमियम रकम, छोराको नाममा मोटरसाइकल र ट्याक्टर खरिद खर्च, कर्जाबापत तिरेको साँवाब्याज रकम, राइस मिलको आयबापत तिरेको आयकर र निज तथा निजको परिवारको नाममा विभिन्न बैंकहरुमा रहेको खाताको मौज्दात गरी एक करोड ७५ लाख ९६ हजार ९९४ रूपैयाँ ३६ पैसा देखिएको थियो ।
आयभन्दा व्यय ९१ लाख ८६ हजार ५४३ रूपैयाँ ३० पैसाबराबर रकमको स्रोत नखुलेको, तत्कालीन अध्यक्ष बनियाँ र उनको परिवारले उच्च जीवनस्तर यापन गरेकोजस्ता कारणले गैरकानुनी रुपमा सम्पत्ति आर्जन गरेको पुष्टि हुन आएको अख्तियारको आरोप थियो ।
