.gif)
 (1).png){kind=logo}
.png)
बानियाँलाई ‘मिलाउन’ भन्ने देउवाको आश्वासन, लामा पक्षका १४ सांसद अझै असन्तुष्ट
बानियाँले बोलाए संसदीय दलको बैठक, असन्तुष्टको काठमाडौँमा पत्रकार सम्मेलन
.jpg)
मकवानपुर । बागमती प्रदेशका नव नियुक्त मुख्यमन्त्री इन्द्रबहादुर बानियाँले आज (मंगलबार) विश्वासको मत लिँदैछन्। नेपाली कांग्रेसका प्रदेश सभा सदस्य बानियाँ २० साउनमा मुख्यमन्त्री नियुक्त भएका थिए ।
उनी आफ्नै पार्टीका नेता बहादुर सिंह लामालाई अविश्वासको प्रस्तावले हटाउँदै मुख्यमन्त्री बनेका हुन् । बानियाँले विश्वासको मत लिनका लागि आज दिउँसो ४ बजेका लागि प्रदेश सभा बैठक बोलाइएको छ ।
नेपालको संविधानको धारा १६८ को उपधारा (४) तथा प्रदेश सभा नियमावली, २०७४ को नियम १४३ को उपनियम (१) बमोजिम विश्वासको मत लिने प्रयोजनका लागि प्रदेश सभा बैठक बोलाइएको प्रदेश सभा सचिवालयले जनाएको छ ।
बानियाँलाई विश्वासको मत दिन सत्ता साझेदार दुई दल नेपाली कांग्रेस र नेकपा एमालेले ह्वीप लगाएका छन् । मुख्यमन्त्री बनेको ३० दिनभित्र सदनबाट विश्वासको मत लिनुपर्ने संवैधानिक व्यवस्था छ । मुख्यमन्त्री बानियाँले त्यसअघि नै आज विश्वासको मत लिने भएका हुन् ।
११० सदस्यीय प्रदेशसभामा मुख्यमन्त्री बानियाँले बहुमत पाउन ५६ सांसदले उनलाई विश्वासको मत दिनुपर्छ । त्यसो त सत्तारुढ कांग्रेसका ३७ र एमालेका २७ गरी उनका पक्षमा ६४ सांसद हुनुपर्ने हो तर आफ्नै पार्टीका सांसद निर्वतमान मुख्यमन्त्री बहादुरसिंह लामा समूहका १४ जनाले धोका दिने हो कि भन्ने चिन्ता बानियाँलाई छ ।
किनकी लामाले आफ्नो कार्यकालमा मन्त्री बनाएका आफूपक्षीय तीन सांसदलाई सहमतिअनुसार अहिलेको सरकारमा पनि निरन्तरता नदिएको भनी लामा पक्ष बानियाँसँग रुष्ट छ । यस विषयमा लामा समूह काठमाडौँमा पार्टी सभापति शेरबहादुर देउवासँग निरन्तर छलफलमा छ ।
यसबीच लामा समूहका १४ सांसदले आफूपक्षीय ३ जनालाई मुख्यमन्त्री बानियाँले मन्त्री नबनाए विश्वासको मत नदिने तथा उस्तै परे प्रदेशसभा सदस्यबाटै सामूहिक राजीनामा दिने चेतावनी पनि दिए ।
सोमबार सभापति देउवाले लामा समूहका सांसदहरूलाई बानियाँलाई विश्वासको मत दिन निर्देशन दिएका छन् । लामा निकट प्रदेश सांसद गोविन्द लम्सालका अनुसार छलफलका क्रममा पार्टी सभापति देउवाले जालझेल नगरी मुख्यमन्त्रीलाई विश्वासको मत दिन निर्देशन दिएका हुन् ।
पार्टी सभापति देउवाको भनाइ उद्धृत गर्दै लम्सालले भने, ‘मन्त्री नियुक्ति गराउन म मुख्यमन्त्रीलाई भन्छु । तपाईंहरू अहिले विवाद नगरी मुख्यमन्त्रीलाई विश्वासको मत दिनुहोस् । एउटै कुरामा सधैँ विवाद गर्दा तपाईंहरूलाई पनि राम्रो हुन्न। पार्टीलाई पनि राम्रो हुन्न ।’
कांग्रेस बागमती संसदीय दलको नेता चुन्न भएको चुनावका दिन अर्थात् साउन १४ गते मन्त्रीमा नियुक्त लम्साललगायत तीन जनाले शपथ खान नभ्याउँदै बानियाँको नेतृत्वमा नयाँ सरकार गठन भएको थियो । सोही तीन जनालाई अहिलेको सरकारमा पनि निरन्तरता दिनुपर्ने अडान लामा समूहको छ ।
पहिला उनीहरूलाई मन्त्री नियुक्ति गरेपछि मात्रै विश्वासको मत दिने लम्सालको दाबी छ । मुख्यमन्त्री इन्द्रबहादुर बानियाँले अपराह्न ४ बजे विश्वासको मत लिने तालिका बाहिर आइरहँदा कांग्रेसकै असन्तुष्ट १४ प्रदेश सांसद भने काठमाडौँमै पत्रकार सम्मेलनको तयारीमा जुटेका छन् ।
सोमबार राति अबेरसम्म पनि असन्तुष्ट १४ सांसदसँग नेपाली कांग्रेस बागमती प्रदेश सभापति एवम् मुख्यमन्त्री बानियाँले कुनै भेटघाट र छलफल गरेका छैनन् । सोमबार राति अबेरसम्म १४ सांसद समूहको बैठक बसेको थियो । उनीहरूले मङ्गलवार काठमाडौँमा पत्रकार सम्मेलनको तयारी गरेका छन् ।
आइतबार असन्तुष्ट समूहले पार्टी सभापति शेरबहादुर देउवा भेटेका थिए । बहादुरसिंह लामासहित पुगेको टोलीलाई सभापतिले आश्वासन दिएका छन् । लामाले नियुक्त गरेका मन्त्रीहरूलाई समेट्ने गरी मिलाउने देउवाको आश्वासन छ । ‘धेरै कुरा भएन, उहाँले म मिलाउँछु मात्र भन्नु भएको छ,’ लम्सालले भने ।
