.gif)
 (1).png){kind=logo}
.png)
थाइल्याण्डको प्रधानमन्त्री पदबाट पाटोङटार्न शिनावात्रा पदच्युत
.jpg)
बैंकक । थाइल्याण्डको संवैधानिक अदालतले प्रधानमन्त्री पाटोङटार्न शिनावात्रालाई पदच्युत गर्ने फैसला गरेको छ । अदालतले उनको विवादास्पद फोनवार्ता ’नैतिक आचरणको उल्लङ्घन’ भएको ठहर गर्दै प्रधानमन्त्री पदबाट तत्काल हटाउने निर्णय सुनाएको हो ।
अदालतको फैसलामा भनिएको छ, ‘पैटोंग्तानको कार्यले राष्ट्रको गौरव जोगाउन सकेन र व्यक्तिगत स्वार्थलाई देशभन्दा माथि राखियो, जसले गम्भीररूपमा नैतिक मापदण्ड उल्लंघन गर्यो ।’
पैटोंग्तानले भने उक्त गोप्य फोनवार्तामा आफूले प्रयोग गरेको भाषाशैलीलाई ‘सम्झौताकै रणनीति’ भनेर बचाव गरेकी थिइन् । तर, अदालतले उनको तर्क अस्वीकार गर्दै सो वार्ताले थाइल्याण्डको हितभन्दा क्याम्बोडियाको हितलाई बढी फाइदा पुग्ने शंका जनसाधारणमा बढाएको बताएको छ । अदालतले भनेको छ, ’यस कदमले जनतामा प्रधानमन्त्री पदप्रति विश्वास र आस्था गुमाएको छ र प्रधानमन्त्रीको कार्य सम्पादनमा गम्भीर क्षति पुगेको छ ।’
संवैधानिक अदालतको यस निर्णयसँगै पैटोंग्तानको पद तथा मन्त्रीपरिषद् तत्काल विघटन भएको छ । उनी २००८ पछि अदालतद्वारा पदबाट हटाइने पाँचौं प्रधानमन्त्री बनेकी छन् । गत जुलाईमा क्याम्बोडियाका नेता हुन सेनसँग भएको उनको फोनवार्ता लीक भएपछि आलोचना तीव्र बनेको थियो र उनी निलम्बनमा परेकी थिइन् ।
३७ वर्षकै उमेरमा प्रधानमन्त्री बनेकी उनी थाइल्याण्डकै सबैभन्दा कान्छी र दोस्रो महिला प्रधानमन्त्री थिइन् । यसअघि उनकी काकी यिङलक शिनावात्रा सन् २०११ देखि २०१४ सम्म प्रधानमन्त्री भएकी थिइन् ।
‘उङ इङ’ उपनामले चिनिने उनी २०२१ मा फ्यु थाइ पार्टीमा प्रवेश गरी २०२३ मा पार्टी नेतृ बनेकी थिइन् । गत वर्ष स्रेत्था थाविसिनलाई पदबाट हटाएपछि थाइल्याण्डको संसद्ले उनलाई नयाँ प्रधानमन्त्रीका रूपमा चयन गरेको थियो । शिनावात्रा परिवार दशकौँदेखि थाइल्याण्डको राजनीतिमा प्रभावशाली रहँदै आएको छ । पैटोंग्तानको पदच्युतिले यो राजनीतिक वंशलाई ठूलो धक्का पुगेको विश्लेषण गरिएको छ ।
