.gif)
 (1).png){kind=logo}
.png)
बस र विङ्गर ठोकिँदा तीनको मृत्यु, १७ जना घाइते
सुनसरी । पूर्व पश्चिम राजमार्गअन्तर्गत भोक्राहा नरसिंह गाउँपालिका–३, जलुवाटोलमा आज (सोमबार) बिहान बस र विङ्गर ठोकिँदा तीन जनाको मृत्यु भएको छ भने १७ व्यक्ति घाइते भएका छन्।प्रहरीका अनुसार बिहान ७ः१५ बजेतिर काँकडभिट्टाबाट खोटाङको दिक्तेलतर्फ जाँदै गरेको मे १ ख १७९९ नम्बरको बस र विपरीत दिशाबाट आउँदै गरेको प्र २–०१–००१ ज ००४७ नम्बरको विङ्गर एकआपसमा ठोकिएका हुन् ।
दुर्घटनामा २ जनाको घटनास्थलमै मृत्यु भएको हो । उपचारका क्रममा थप एक जनाको मृत्यु भएपछि मृतकको संख्या ३ पुगेको प्रहरीले जनाएको छ । भोक्राहास्थित ग्लोबल कार्डियो एन्ड न्युरो अस्पतालमा उपचाररत १५ जनामध्ये २ पुरुषको मृत्यु भएको हो भने इनरुवास्थित सुनसरी जिल्ला अस्पतालमा उपचाररत १ महिलाको मृत्यु भएको हो ।
घाइतेमध्ये ४ जनाको अवस्था गम्भीर, १२ जनाको अवस्था मध्यम र १ जनाको अवस्था सामान्य रहेको जिल्ला प्रहरी कार्यालय सुनसरीका एसपी सुमन तिमल्सिनाले जानकारी दिए । उनीहरू पहिचान खुलिसकेको छैन । बस चालक झापा अर्जुनधारा नगरपालिका–१ का ३६ वर्षीय गोपाल अधिकारीलाई नियन्त्रणमा लिइएको छ भने विङ्गर चालक घाइते भई उपचाररत छन् ।
