.gif)
 (1).png){kind=logo}
.png)
‘राष्ट्रियता र देशभक्तिपूर्ण गीत–संगीत संसारभर गुञ्जिन थालेको छ’
काठमाडौं । संस्कृति, पर्यटन तथा नागरिक उड्डयनमन्त्री बद्रिप्रसाद पाण्डेले नेपाली राष्ट्रियता र देशभक्तिपूर्ण गीतसंगीत अहिले संसारभर गुञ्जिन थालेको भन्दै खुशी व्यक्त गरेका छन् । काठमाडौँमा आज नेपाल संगीत तथा नाट्या प्रज्ञा प्रतिष्ठानद्वारा आयोजित स्रष्टा सम्मान कार्यक्रमलाई सम्बोधन गर्दै उनले विगतमा नेपालभित्र पनि विदेशी गीतहरुले उच्च स्थान पाइरहेकामा अहिले नेपालमा मात्रै होइन विश्वभर नै नेपाली गीत संगीतले उच्च स्थान पाइरहेको बताए ।
यसरी नेपाली गीत अरुले पनि सुन्नु भनेको यसको महत्व बढेको बताउँदै उनले अझै नेपाली कला संस्कृतिलाई माथि उठाउन गीत संगीत तथा नाट्य क्षेत्रको महत्वपूर्ण भूमिका हुने बताए । राष्ट्रपति रामचन्द्र पौडेलको समुपस्थितिमा भएको सम्मान समारोहमा बोल्दै सांस्कृतिमन्त्री पाण्डेले आज सम्मानित हुने अग्रज स्रष्टाबाट खारिएको उत्पादन आउने र आफ्ना नयाँ पुस्तालाई हस्तान्तरण हुने विश्वास व्यक्त गरे । उनले सम्मानित भएका नौ स्रष्टाहरुले आज राष्ट्रिय परिचयपत्र र पहिचान प्राप्त गरेको उल्लेख गरे ।
उक्त समारोहमा पाँच दशक बढी समयदेखि गीत संगीतको क्षेत्रमा सक्रिय वरिष्ठ गायक दीप श्रेष्ठलाई ‘नेपाल संगीत तथा नाट्य प्रज्ञा प्रतिष्ठान दीर्घ साधना सम्मान’ प्रदान गरिएको थियो । विसं २००७ मङ्सिर २६ गते सुनसरीको धरानमा जन्मनुभएका गायक श्रेष्ठले १८ वर्षको उमेरमा रेडियो नेपालमा ‘म पत्थरको देवता होइन’ बोलको गीत रेकर्ड गरी संगीत क्षेत्रमा प्रवेश गरेका थिए । उक्त सम्मानको राशि रु दुई लाख र ताम्रपत्र रहेको छ ।
श्रेष्ठले रेडियो नेपालबाट २०२७ र २०२८ सालमा पुरुषतर्फ उत्कृष्ट गायन उपाधि एवं २०३० सालमा स्वर्ण पदक प्राप्त गरेका थिए । उनले ४०० बढी गीत गाएका छन् । वरिष्ठ गायक श्रेष्ठले संगीतको क्षेत्रमा गरेको अतुलनीय योगदानको कदर गर्दै यसपालि दीर्घ साधना सम्मान प्रदान गरिएको नेपाल संगीत तथा नाट्य प्रज्ञा प्रतिष्ठानका कुलपति निशा शर्मा पोखरेलले जानकारी दिए ।
उनले प्रतिष्ठानको अझै आफ्नो भवन बन्न नसकेकाले डिपिआर तयार भएको जानकारी दिँदै भवन निर्माणका लागि आवश्यक पहल लिन मन्त्री पाण्डेसँग आग्रह गरे । सो क्रममा प्रतिष्ठानका उपकुलपति शम्भू राईले प्रतिष्ठानले स्रष्टाको योगादनको मूल्याङ्कन गर्दै यसपाली दीर्घ साधना सम्मानका साथै बाध्यबादन र खोज अनुसन्धान विधामा समेत सम्मान तथा पुरस्कारको थालनी गरिएको बताए ।
उक्त समारोहमा विभिन्न विधामा आठजना अग्रज स्रष्टालाई ‘नेपाल सङ्गीत तथा नाट्य राष्ट्रिय प्रज्ञा पुरस्कार’ पनि वितरण गरिएको थियो । उक्त पुरस्कारको राशि जनही रु एक लाख रहेको नेपाल संगीत तथा नाट्य प्रज्ञा प्रतिष्ठानका सदस्यसचिव कुश्मा महरा प्रगतिले जानकारी दिए ।
उक्त पुरस्कार पाउनेमा रङ्गमञ्च विधामा वरिष्ठ रङ्गकर्मी हरिबहादुर थापा, संगीत विधामा वरिष्ठ गायिका कुन्ती मोक्तान, नाट्य विधामा वरिष्ठ नाट्यकर्मी वेदकुमारी न्यौपाने, नृत्य विधामा वरिष्ठ नृत्य निर्देशक भुवनदास श्रेष्ठ, नृत्य खोज तथा अनुसन्धान विधामा वरिष्ठ अनुसन्धानकर्ता कृष्णप्रसाद पौडेल, लोकसंगीत विधामा वरिष्ठ लोक गायक नारायण रायमाझी, परम्परागत तथा शास्त्रीय संगीत विधामा कुशेश्वर राई र वाद्यबादन विधामा वरिष्ठ वाद्ययबादक राजु अग्रवाल रहेका छन् ।
