.gif)
 (1).png){kind=logo}
.png)
ऊर्जासचिव आचार्यद्वारा स्पष्टीकरण दिन अस्वीकार, राज्यमन्त्री तामाङ अदालत जाने
काठमाडौं । ऊर्जा, जलस्रोत तथा सिँचाइ राज्यमन्त्री पूर्णबहादुर तामाङले सोधेको स्पष्टीकरणको जवाफ दिन ऊर्जासचिव सुरेश आचार्यले अस्वीकार गरेका छन् । राज्यमन्त्री तामाङले गत चैत २८ गते सचिव आचार्यलाई २४ घण्टे स्पष्टीकरण सोधेका थिए ।
उनले वैशाख ४ गतेसम्म पनि स्पष्टीकरण बुझाउन चासो देखाएका छैनन् । जलस्रोत तथा सिँचाइ विभागले चैत २५ गते सिँचाइ दिवस एवं ७२औँ वार्षिक उत्सवको कार्यक्रम गरेको थियो । त्यसमा राज्यमन्त्री तामाङ प्रमुख अतिथि थिए । विभागको सभाहलमा प्रवेशको क्रममा कार्यक्रम सञ्चालकले उद्घाटन समारोहको क्रममा आसन ग्रहणका लागि बोलाउँदा समेत मञ्चमा सहभागी नभई बेवास्ता गरी बाहिरिएको भन्दै स्पष्टीकरण सोधेका थिए ।
‘आजसम्म (शुक्रबार) सचिवले स्पष्टीकरण दिएको छैन’, मन्त्री तामाङले भने, ‘आइतबार फेरि स्पष्टीकरण सोध्छु । नदिए मंगलबार आदालतमा मुद्दा हाल्ने तयारीमा छु ।’ उनले ऊर्जा सचिवबाट हटाउने नहटाउने सरकारको विषय भएकाले आफूले गर्न सक्ने विषयबाट पछाडि नहट्ने बताए । सचिव आचार्यलाई आसन ग्रहणका लागि आग्रह गर्दा पनि राज्यमन्त्री सहभागी कार्यक्रममा आफू बस्न तयार नभएको भन्ने तुच्छ अभिव्यक्ति दिएको, पदीय आचरण पालना नगरेको मन्त्री तामाङको आरोप छ ।
