रवि लामिछानेलाई लगियो भैरहवा

---

नयाँ पेज

१७:१९ बजे

काठमाडौं । राष्ट्रिय स्वतन्त्र पार्टी (रास्वपा) सभापति रवि लामिछानेलाई भैरहवा लगिएको छ । अदालतको आदेशपछि शुक्रबार राति पक्राउ परेका रविलाई  शनिबार बिहान रुपन्देही लगिएको हो । शुक्रबार राति निवासबाटै पक्राउ परेका लामिछानेलाई प्रहरीले यती एयरलाइन्सको विमानमार्फत भैरहवा लगेको हो ।

पूर्व गृहमन्त्री समेत रहेका उनलाई शुक्रबार राति भद्रकालीस्थित जिल्ला प्रहरी परिसर, काठमाडौंकै हिरासतमा राखिएको थियो । गोर्खा मिडिया नेटवर्कमा तत्कालीन प्रबन्धक समेत रहेका सभापति लामिछानेलाई सहकारी ठगी प्रकरणमा उच्च अदालत तुलसीपुर (बुटवल इजलास) ले शुक्रबार साँझ थुनामा पठाउने आदेश दिएको थियो । 

अब उनलाई भैरहवास्थित कारागारमा पुर्पक्षका लागि थुनामा पठाइने छ । शनिबार र आइतबार सार्वजनिक बिदा परेका कारण दुई दिन जिल्ला प्रहरी कार्यालयको हिरासतमा राखिने रुपन्देही प्रहरी प्रमुख रञ्जीतसिंह राठौरले जानकारी दिए । ‘आज र भोलि सार्वजनिक बिदा छ’ एसपी राठौरले भने, ‘जिल्ला अदालत रुपन्देहीमा उपस्थित गराएर कारागार चलानको प्रक्रिया अघि बढ्छ । त्यसैले आज र भोलि उहाँ प्रहरी हिरासतमा रहनु हुन्छ ।’

लामिछानेलाई शुक्रबार राति नै प्रहरीले निवासबाट पक्राउ गरेको थियो । बुटवलस्थित सुप्रिम बचत तथा ऋण सहकारी प्रकरणमा जिल्ला अदालत, रुपन्देहीले उनलाई एक करोड धरौटी माग गरेको थियो । उक्त आदेश चित्त नबुझेको भन्दै लामिछाने साधारण तारेखमा छाड्नुपर्ने मागसहित उच्च गएका थिए। सरकारी वकिलको कार्यालय समेत धरौटीमा छाड्ने आदेशविरुद्ध उच्च अदालत गएको थियो । यही प्रकरणका आरोपित पूर्व डीआईजी छविलाल जोशीले समेत जिल्लाको आदेशविरुद्ध निवेदन दिएका थिए । अदालतले जिल्ला आदेशको आदेश सदर गरेको छ ।