गुरागाईंलाई समर्थन गर्दै बालेनविरुद्ध दुई कर्मचारी संगठन

---

नयाँ पेज

१९:११ बजे

काठमाडौं । काठमाडौँ महानगरपालिकाका प्रमुख प्रशासकीय अधिकृत सरोज गुरागाईलाई दुई कर्मचारी संगठनले समर्थन जनाएका छन् । उनीहरुले गुरागाईलाई सहज रुपमा काम गर्ने वातावरण बनाउन समेत आग्रह गरेका छन् । बिहीबार एक विज्ञप्ति जारी गर्दै स्थानीय तह कर्मचारी युनियनका अध्यक्ष नरबहादुर साउद र स्थानीय तह कर्मचारी संघका महासचिव शम्भु बरालले विज्ञप्ति जारी गर्दै गुरागाईलाई काम गर्ने वातावरण बनाउन महानगरलाई आग्रह गरेका हुन् ।  

बिहीबार १०४ दिनपछि महानगरमा हाजिर गर्न गएका गुरागाईलाई महानगर प्रमुख बालेन्द्र शाह (बालेन) पक्षले अवरोध गरी रोक्ने खोजेको थियो । तर उपमेयर सुनिता डंगोलसहितले कार्यालय प्रवेश गराएको थियो। त्यतिबेला मेयर बालेन भने कार्यालयमा थिएनन् । गुरागाईलाई ढोका फुटाएर कार्यकक्ष प्रवेश गराइएको थियो । यसै विषयमा दुवै कर्मचारी संगठनले गहिरो ध्यानाकर्षण भएको जनाएका छन् । 

‘विगत तीन महिनादेखि प्रशासनिक नेतृत्वविहीन हुँदा समग्र काठमाडौं महानगरपलिकाको प्रशासनिक संयन्त्र अस्त व्यस्त बनेको छ,’ उनले भने, ‘महानगरपालिका कोषबाट पारिश्रमिक लिने शिक्षक, सफाई मजदुर लगायत सम्पूर्ण कर्मचारीहरुले महिनौं देखि पारिश्रमिक नपाउँदा झण्डै पाँच हजार पेशाकर्मीहरुको दैनिकी चल्न सकिरहेको छैन, ती र तिनका बालवालिकाहरुको वार्षिक परिक्षाको शुल्क बुझाउन नपाउंदा आम बालबालिकाहरुको भविष्यनैं अन्योल हुने अवस्था सृजना भएको छ भने महानगरको विकास निर्माण लगायतका कार्यहरु ठप्प छन् ।’

‘महानगरपालिका नगरकार्यपालिकाको कार्यालयमा खटाइएका प्रमुख प्रशासकीय अधिकृत हाजिर हुन कार्यालयकमा उपस्थित हुने क्रममा नगरप्रहरी बाट भएको अवरोध अध्यन्तै दुःखद छ,’ उनीहरूले भनेका छन् ।