.gif)
 (1).png){kind=logo}
.png)
दलित अभियन्ता खगेन्द्र सुनार पक्राउ
काठमाडौं । ‘दलितका लागि दलित’ अभियानका संयोजक खगेन्द्र सुनारलाई प्रहरीले पक्राउ गरेको छ । सोमबार संसद भवनको निषेधित क्षेत्रमा प्रवेश गर्न लागेपछि सुनारलाई प्रहरीले नियन्त्रणमा लिएको जिल्ला प्रहरी परिसर काठमाडौंका एसपी अपिलराज बोहोराले जानकारी दिए ।
‘निषेधित क्षेत्रमा प्रवेश गर्न थालेपछि नियन्त्रणमा लिएका हौं,’ एसपी बोहोराले भने । सुनार गृहमन्त्री रमेश लेखकमाथि कानुनी कारबाही हुनुपर्ने माग गर्दै प्रदर्शन गरिरहेका छन् । अन्तरजातीय विवाह गरेका दलित युवामाथि अत्याचार गरेको आरोपमा गृहमन्त्री लेखकमाथि कारबाहीको माग गर्दै आएका छन् ।
सर्लाहीको बरहथवाका नेहा रौनियार र सत्येन्द्र रामको प्रेमविवाहमा गृहमन्त्री लेखकको निर्देशनमा छुटाउन खोजिएको आरोप छ । कानुनी रूपमा योग्य मानिएको विवाहलाई जातीय विभेद गर्दै छुट्टाउन भूमिका खेलेको समाचार बाहिरिएको थियो । त्योसँग दलित अभियान्ताहरूले गृहमन्त्री लेखकको राजीनामा माग्दै सडकमा प्रदर्शन गरिरहेका छन् ।
दलित अधिकारकर्मीहरूले सत्येन्द्र–नेहा जोडीलाई पक्राउ गर्न प्रहरीकै संलग्नतामा भारतसम्म टोली पठाइएको, उनीहरूलाई पटक–पटक झुट्टा मुद्दा लगाइएको जस्ता घटनाको विरोधमा सुनारले आन्दोलन चर्काएका छन् । उक्त जोडीलाई गत पुस ९ गते प्रहरीले पक्राउ गरेको थियो । तर, सर्वोच्च अदालतले उनीहरूकै पक्षमा फैसला गरिसकेको छ।
